2023 чылдың төнчүзүнде Россияның Чурагайлыг хөгжүлде яамызы Россияның Тудуг яамызы-биле кады чуртталга-коммунал ажыл-агыйының (ЧКХ) шупту айтырыгларын чаңгыс көзенекте шиитпирлээр «Госуслуги Дом» деп чаа капсырылганы ажылдаткан. Ол капсырылгага чуртталга-коммунал ачы-дузазын төлеп, агар санның сан-көргүзүглерин дамчыдып, башкарыкчы компанияже (УК) билдириишкиннерни чорудуп, капитал септелгениң графигин хайгаарап, ниити бажыңның хуралдарынга онлайн киржип база өске-даа аргаларны ажыглап болур.
Бир чыл чартык дургузунда бүгү чурттан 11 миллион ажыг хамаатылар ол ачы-дузаны ажыглаан.
Регионалдыг Чуртталга-коммунал ажыл-агый яамызының дыңнатканы-биле алырга, бо чылдың июль төнчүзүнге чедир «Госуслуги Дом» деп мобильдиг капсырылгада Тыва Республикадан 10750 ажыглакчы бүрүткеттинген.
Коммунал ачы-дуза төлевирлерин төлээри болгаш счетчиктерниң көргүзүглерин дамчыдары - капсырылганың эң нептереңгей кезээ апарган. СБП таварыштыр төлевирлерни комиссия чокка төлеп болурун сагындыраалыңар.
Оон аңгыда, бажың ээлериниң ниити хуралдарын капсырылганы ажыглап, онлайн эрттирери нептерээн. Март 1-ден эгелеп ээлериниң ниити чыыштарын чүгле чуртталга-коммунал ажыл-агыйының күрүнениң информастыг системазы таварыштыр онлайн эрттирип болурун федералдыг хоойлужудулгада быжыглаан. Ол чүүл чурттакчыларга бажыңга хамаарышкан шиитпирни хүннүң кайы-даа үезинде, азы каяа-даа чорааш хүлээп алырынга дузалаар.
2025 чылдан эгелеп, капсырылганы хууда чуртталга бажыңнарының болгаш улуг бажыңнар чурттакчылары ажыглап болур апарган. Оон аңгыда бажың ээзи бодунуң өнчүзүнге бүзүрээр кижилеринге ынаар кирерин чөпшээреп болур. Ол чүүл улуг назылыг чурттакчыларга ажы-төлүнден счетчик көргүзүглерин дамчыдарынга дузалажырын дилээринге, чуртталга-коммунал ачы-дузазын төлээринге, а квартиралар хөлезилекчилеринге коммунал ачы-дузазын төлеп, көргүзүглерни боттары дамчыдарынга дузалаар.