Тыва Республиканың Националдар талазы-биле агентилели Тываның Баштыңының хамааты ниитилелди хөгжүдеринче, күрүне биле ниитилелдиң аразында харылзааны быжыглаарынче, регионда амыдыралдың шынарын бедидеринче угланган грантылар мөөрейинче билдириишкиннерни хүлээп эгелээнин дыңнадып тур. Мөөрейге Тыва Республиканың коммерцияга хамаарышпас организациялары киржип болур.
Тываның Баштыңы Владислав Ховалыг социал четкилерде бодунуң арынында билдириишкиннерни хүлээп эгелээнин дыңнаткан. «Коммерцияга хамаарышпас организацияларның эгелээшкиннерин кезээде деткип турар бис, олар бистиң республикада хамааты ниитилелдиң хөгжүлдезинге болгаш амыдыралдың шынарын бедидеринге үлүг-хуузун киирип турар. А деткимчениң чедимчелиг хевириниң бирээзи - грантыларда» - деп, Баштың дыңнаткан.
Эрткен чылын база шак ындыг мөөрейниң түңнелдери-биле 12 социал эгелээшкиннерни шилип алганын ол сагындырган. Ооң ачызында «Культурлуг автобус», «Интернет-делегейде тыва дыл», «Игротека.BIB», Тываның ыраккы Мөңгүн-Тайга кожуунунга сарлыкчылар фестивалы дээш, оон-даа өске солун төлевилелдер боттанган.
Бо чылын грант деткимчезиниң ниити түңү 13 млн. рубль болган. Акшаландырыышкынны Президентиниң гранты фондузу база регионалдыг бюджеттен аңгылаан.
Тыва Республиканың Чазааның 2023 чылдың ноябрь 7-де № 795 доктаалы-биле бадылаан хамааты ниитилелди хөгжүдеринге Тываның Баштыңының грантыларын бээриниң дугайында дүрүмде тургускан негелделерге дүүштүр Тыва Республикада бүрүткеттинген коммерцияга хамаарышпас организациялар грант алырынче кордап болур.
Конкурс дараазында угланыышкыннарга болур:
1. Социал хандырылга, социал деткимче болгаш хамаатылар камгалалы.
2. Хамаатыларның кадыкшылын камгалаары, амыдыралдың кадык овур-хевирин суртаалдаары.
3. Өг-бүлени, ие-чашты, адаларны база уругларны деткиири.
4. 1996 чылдың январь 12-де “Коммерцияга хамаарышпас организациялар дугайында” №7-ФХ федералдыг хоойлунуң 31.1 чүүлүнде көрдүнген шупту ажыл-чорудулганы хаара тудуп боттандырган аныяктар төлевилелдерин деткиири.
5. Хамаатының эргелерин болгаш хосталгазын камгалаары, ол ышкаш хоругдалда кижилерниң эргелерин камгалаары.
6. Долгандыр хүрээлеңни кадагалаары болгаш дириг амытаннарны камгалаары.
7. Националдар болгаш шажыннар аразында эп-найыралды быжыглаары.
8. Хамааты ниитилелдер институттарын хөгжүдери.
9. Культура болгаш уран чүүл адырында төлевилелдерни деткиири.
10. Россия Федерациязының чоннарның бот-тускйалаңын болгаш дылдарын камгалап арттырары болгаш камгалаары.
11. Экстремисчи болгаш терроржу идеологияга удур профилактика.
Бо чылын субсидия алыкчыларын шилиирде, promote.budget.gov.ru/ күрүнениң саң-хөө деткимчезиниң хемчеглерин көргүзер портал таварыштыр «Электроннуг бюджет» хөй-ниити саң-хөөзүн башкарар күрүнениң каттышкан информастыг системазы-биле хандырар. Ынчангаш мөөрейге киржир күзелдиглер «Техниктиг деткимче / Инструкциялар» деп бөлүкте (promote.budget.gov.ru/support-ce...) видеоматериалдарны база «Бо-ла салыр айтырыглар» деп бөлүкте видеоматериалдарны таныжып көргеш, Порталдың ажыл-чорудулгазы-биле таныжып алырын сүмелээр-дир бис.
Порталче кирип, шилилгеге киржир дизе, Күрүне ачы-дуза порталында бадыткаттынган хууда арыны турар ужурлуг. Кижиниң арынын билдириишкинни киирген юридиктиг черге кожар. Ол ышкаш камгалалдыг электроннуг хол үжүү болгаш бүзүреткен бижик (удуртукчузу өске кижиге бүрүн эргени дамчыткан таварылгада) база херек.
2025 чылдың август 4-тен сентябрь 2-ниң 23:59 шакка чедир чагыгларны хүлээр.
Киржириниң айтырыгларын база методиктиг дуза алырда дараазында адресте мөөрейниң оператору болгаш дүүштүрүкчүзү - Тыва Республиканың националдар херектериниң талазы-биле агентилелче баар азы долгаар: Кызыл хоорай, Калинин кудумчузу, бажың 1 «Б», кабинет 300 (Машзавод, 3-кү каът). Телефон: +7 (39422)6-00-62.