Тываның Баштыңы Владислав Ховалыг ажыл-агыйжы чорук үезинде Чадаанада чаа школаның тудуун хынап көрген. РФ-тиң «Өөредилгениң хөгжүлдези» күрүне программазының иштинде «Школа назыны четпээн болгаш ниити өөредилгени хөгжүдери» программаның «Амгы үениң школазы» деп федералдыг төлевилел күүселдези-биле объектиде тудуг ажылдары чорудуп турар.
Үш каът школа улуг залдыг, 180 олуттуг столоваялыг, ийи спортчу залдарлыг база бир тренажер залдыг. Школа девискээринде көрүкчүлерге ийи трибуналыг стадионну туткан. Школа чырык болгаш делгем класстарлыг, ону чаа эт-сеп, амгы үениң өөредилге дериг-херекселдери-биле дерээн. Школа ниитизи-биле 13 муң ажыг дөрбелчин метр шөлдүг. Оон аңгыда камгалал болгаш дыңнадыг системалары база автоматтыг өрт медээчизи-биле чепсегленген.
Владислав Ховалыг школа тудуун «Өөредилге» национал төлевилелдиң күүселдези-биле боттанган «Аныяктар болгаш уруглар» деп чаа национал төлевилелдиң ажылы-дыр деп демдеглээн. Тудуг ажылдары адакталган, чаа өөредилге чылында школа ажылдап эгелээр дээрзин республика баштыңы демдеглээн.
Керээ езугаар «Восток» КХН тудуг ажылдарын чорудуп турар. Объектиде 250 ажылчыннар болгаш 10 санныг тудуг техниказы хаара туттунган. Амгы үеде кошкак токтуг системаларны эптеп, сантехниктиг дериг-херекселдерни кожуп тургузуп, мебельдерни болгаш өөредилге дериг-херекселдерин салып турар. Школа девискээрни чаагайжыдып, херимнеп, котельнаяның участогунда асфальт-бетон шывыгны салып турар.
Чадаана хоорайның Тиилелгениң 40 чылы кудумчузунда, эргиде автотранспорт бүдүрүлгези турган черде школаны туткан. Хоорайның ол кезек девискээри ам-даа хөгжүп,чадаанажыларны хаара тудар төптериниң бирээзи апаар боор деп, Владислав Ховалыг бүзүрелин илереткен.
Россия Федерациязының Президентизи Владимир Путинниң эгелээшкини-биле республикада болгаш бүгү чуртта чаа үениң школалары туттунуп турарын Тываның Баштыңы сагындырган. «Удавас Кызыл кожууннуң Каа-Хем хоорай хевирлиг суурунга, Таңдының Бай-Хаак, Улуг-Хемниң Чодураа суурларынга база Кызыл хоорайның ийи микрорайонунга чаа школалар ажыглалче кирер. Бистиң ажы-төлүвүс эки байдалдарда эртем-билигни чедип алыр ужурлуг» - деп, республика баштыңы онзалап демдеглээн.