Тываның Баштыңы Владислав Ховалыг Моолдуң Увс аймааның губернатору Сэмжидийн Батжаргал-биле аймактың чүс чылдаанынга тураскааткан байырлыг хемчеглер үезинде ужурашкан. Увс аймактың губернатору баштаан моол делегация Кызыл хоорайга болуп эрткен Улуг Тиилелгениң 80 чылынга тураскааткан хемчеглерге бо чылдың майда киржип чорда ийи тала дугуржулгага аттарны салган, бот-боттарынга ажыктыг ол кады ажылдажылгага хамаарышкан элээн каш айтырыгларны бо удаада база чугаалашкан.
«Губернатор Сэмжидийн Батжаргал-биле ужурашкаш, Увс аймактан Ховдче автоорук септелгези кайы хире чоруп турарын чугаалаштывыс. Ол бистиң регионнарның садыг-экономиктиг хөгжүлдезинге эки салдарлыг орук. Республиканың Көдээ ажыл-агый яамызындан бистиң специалистеривисти база чорударын дугуруштувус. Моол тала бистиң бүдүрүлгелеривисти болбаазырадыр эът-биле хандырарынга сонуургалдыг. Бо угланыышкынга кады ажылдаар бис» - деп, Владислав Ховалыг ужуражылга соонда бодунуң блогунда дыңнаткан.
Аймактың төвү Улаангом хоорайга эрткен юбилейлиг хемчеглерниң бир кезээ болур байырлыг хуралда Владислав Ховалыг байырлыг сөстү алган. Кожа-хелбээ чурттарның регионнарын социал-экономиктиг харылзаалар-биле быжыглаан быжыг найырал тудуштурганын ол демдеглээн. Олар бот-боттарын шагдан тура деткижип чоруур. Увс аймааның юбилейлиг чылында Улаангом – Ховд автоорук тудуунуң эгелээни – онзагай болуушкун. Россияны, Моолду болгаш Кыдатты харылзаштырып турар транспорт оруу – келир үеде стратегтиг логистика объектизи апаар.
Владислав Ховалыг Тыва Республиканың хөй националдыг чонунуң өмүнээзинден Увс аймактың чурттакчыларынга чечектелиишкинни, чедиишкиннерни база шапкын хөгжүлдени күзээн.
Тываның Баштыңы Улаангомга культурлуг программа үезинде өглер делгелгезин көрүп, сонуургаан. Владислав Ховалыг көшкүн чоннарның чурттаар оран-савазын кылырынга моол ус-шеверлерниң мергежээнин магадап көргенин бодунуң блогунда үлешкен. «Өгнү бүдүрүп кылыр арга-мергежилдеривисти чидирип алыр часканывыс чажыт эвес. Моол кожаларывыс ол уран чүүлдү катап тургузарынга биске дузалашкан. Бистиң мастерлеривис өгнү кылырының бурунгу билиглерин болгаш аргаларын чоорту катап эгиткен. Ындыг болзажок өглер кылырынга моол өңүктерден өөренип болур чүүлдер ам-даа бар-дыр. Олар үе-биле деңге базып, үндезин арга-хевирлерни улам чаартып, экижидерин уламчылавышаан» - деп, Тываның Баштыңы айыткан.
Увс аймак 1925 чылда чөөн болгаш барыын Дөрбет аймактарны каттыштырып, дараазында Увс аймактың кызыгаарын тургускан соонда, 1931 чылдың февраль 6-да үндезилеттинген. Аймактың 19 сумузунда 86 муң чурттакчы чон бар. Көдээ ажыл-агый база ачы-дуза адыры – аймактың экономиказының үндезини. Аймактың мал ажыл-агыйы үш сая баш мал-маганныг. Аймактың административтиг төвү Улаангом хоорай садыг-саарылга болгаш ачы-дуза адырының ачызында шапкын хөгжүлдени алган.