Тывада Чадаана – Бажың-Алаак оруунуң 5-тен 12-ги километр аразында участогунга асфальт-бетон шывыгны салыр ажылдар доозулган. Тываның Баштыңы Владислав Ховалыг социал четкилерде блогунда, республиканың база бир суурунга үрде манааны асфальтылыг орук тудуу доозулган дугайында өөрүнчүг медээни дыңнаткан.
«Амгы үениң технологияларын ажыглап кылган асфальтылыг чаа орук-биле суурнуң чурттакчылары болгаш чорукчулар чоруп эгелээн» - деп, ол демдеглээн. Ол ышкаш орукчулар суурнуң төп кудумчузунда оруктуң бир километринге асфальтыны чатканынга суурнуң чурттакчылары дыка өөрээнин Владислав Ховалыг бижээн. «Оруктар экиде чоннуң амыдырал-чуртталгазының шынары экижиир, бизнес болгаш туризмниң хөгжүлдезинге таарымчалыг байдалдар тургустунар» - деп, Владислав Ховалыг демдеглээн.
«Амыдыралга инфраструктура» национал төлевилелдиң күүселдези-биле федералдыг деткимчениң ачызында оруктуң 7,03 км хемчээлдиг участогун Тыва Республика бюджединден кады акшаландырыышкын-биле септээн. Бо чылын национал төлевилел шугуму-биле Чөөн-Хемчик кожууннуң Чадаана – Суг-Аксы автооруунда 9,5 км хире хемчээлдиг орук кезиинде ажылдар чоруп турар.
Тыва Республиканың өске кожууннары-биле Хакасияны харылзаштырган Бай-Тайга кожуунда «Ак-Довурак – Тээли» авторуу кол транспорт судалы болур. Бо хонуктарда ук орукту чаартып септээр улуг ажылдар калбарган. «Восток» КХН тудуг организациязы оруктуң эрги асфальтызын адырып¸ сай-довуракты төп, дескилээр ажылдарже кирген.
Ол социал объектилерже, аргыжылга ачы-дузазынче база транспорт шугумнарынче орукту ажыдып, 10 муң хире кижиге ачы-дузаны чедирип турар. Оруктуң айыыл чок чоруун бедидип, шимчээшкинге эки байдалдарны тургузар дээн септелге ажылдарында кол орук шывыын катап салып, чаа асфальтыны чадары көрдүнген.
Регионалдыг Орук-транспорт яамызының дыңнатканы-биле алырга, бо чылын национал төлевилел болгаш «Көдээ суурларның комплекстиг хөгжүлдези» база «Тыва Республиканың транспорт системазын хөгжүдери» күрүне программаларының шугуму-биле республика оруктарынга болгаш орук объектилеринге ниитизи-биле 44 хемчегни планнаан. Эде чаартыр орук участоктарының ниити узуну 156,62 километр, ында 270 дилиндек метр узун 2 көвүрүг база 156,35 километр узун 42 орук участоктары бар.
Кызылдың агломерациязында ниитизи-биле 5 ажыг километр узун 8 орук участогун, а регионалдыг оруктарда 150 ажыг километр хемчээлдиг 17 участокту, ооң иштинде күрүне программазы-биле көдээ чурттакчылыг черлерде 3 километр оруктарны септеп турар.
Оон аңгыда, Хадың биле Тээли суурларның кирер черинде оруктарны, «Бояровка – Тоора-Хем» база «Мугур-Аксы – Кызыл-Хая» оруктар участоктарын, ол ышкаш «Бүрен-Аксы – Элегес-Аксы – Кунгуртуг» кышкы оруктан Сизимге чедир участокту база Хадың болгаш Дус-Хөл хөлдер кирер оруктарны таарымчылыг байдалче киирерин 2025 чылда планнаан.
Шупту объектилерде септелге ажылдарын бо чылдың үшкү болгаш дөрткү кварталында доозар.