«Узун болгаш идепкейлиг назы-хар» деп чаа национал төлевилелде кирген «С гепатитке удур демисел болгаш аарыгның нептерээр айыылын эвээжедири» программа езугаар республиканың 5 муң ажыг чурттакчыларын 2025 чылдың бирги чартыында С гепатитке шинчилээн. Эмчи шинчилгезиниң бир кезээ кылдыр 25 хардан өрү назылыг эр, херээжен кижилер 10 чылда чаңгыс катап гепатит С-ге скринингини эртер.
Тываның Кадык камгалал яамызының дыңнатканы-биле алырга, чыл эгезинден бээр төлевилел езугаар 34 аарыг кижини эм-таң-биле хандырган. Бир аарыг кижиге 2-3 айның дургузунда эмнээшкин курузунга ортумаа-биле 102 бөлүк эмнер херек. Ниитизи-биле 8 млн. рубль өртектиг эмнерни федералдыг акша-хөреңги-биле бо чылын саткан.
Регионнуң Кадык камгалал яамызының халдавырлыг аарыглар талазы-биле шаттан дашкаар кол специализи Чечек Ондар С гепатитти эмнээниниң үре-түңнели 98-99% чедип турарын демдеглээн. Эмнээшкин доозулган соонда 12 неделя эрткенде, база катап лабораторлуг шинчилелди чорудуп, хайгааралга улаштыр алыр. Чыл төнчүзүнге чедир 76 аарыг кижини хүндүскү стационарда эмнээриниң курузу көрдүнген, а 2024 чылда 37 кижи эмнеткен.
Республикада С гепатиттиң айтырыы чидиг хевээр, чүге дизе 309 аарыг кижиге эмнээшкин херек, чылдың-на 75 хире аарыг чаа кижи илереттинип турар. Вирустуг гепатиттен аараан аарыг кижилерни демдеглеп, ол ышкаш эргежок чугула эмнерниң хереглелин тодарадыр дээш, 2024 чылдың төнчүзүнде федералдыг реестрни тургускан.
"Халдавырлыг гепатиттиң хевирлери-биле аараанының, аарыг кижилерни эмнээниниң болгаш ооң шынарының дугайында медээлерни чыыр арганы реестр бери турар. Тургустунган чаңгыс бааза эмнерниң шын үлелгезин хандырып, херек чүүлдерниң чедишпезин болдурбас" - деп, регионалдыг Кадык камгалал яамызы демдеглээн.