Тываның Баштыңы Владислав Ховалыг республиканың ус-дарган мастерлериниң командазынга 1-ги делегей чергелиг «Куйактанар» ус-шеверлер этнофестивалынга чедиишкинниг болганы дээш байырын чедирген. Алтай Республикага июль 26-27 хүннеринде болган хемчегни Саха (Якутия) Республиканың болгаш Алтай Республиканың дарганнар ниитилели организастаан. Көшкүн чоннарның чаңчылчаан ус-дарганнаашкынын катап диргизип, катап нептередир сорулга-биле фестивальды эрттирген.Тывадан делегацияны республиканың шылгараңгай дарганнары кирген «Ураанхай» команда төлээлээн. Чогаадыкчы коллектив бедик мергежилин база ус-шеверин көргүскеш, бирги черни ээлээн. «Бистиң талантылыг мастерлеривис Орлан Сатка, Монгуш Аңчыга, Кенин Сатка, Бадый Ондарга база Александр Сатка тиилелгези дээш байыр чедирип тур мен! Чедиишкиннер ам-даа улашсын!» — деп, Владислав Ховалыг социал четкилерде бодунуң блогунда бижээн. Бо фестиваль Алтай, Саха (Якутия), Тыва, Бурят республикалардан, ол ышкаш Уралдан, Моолдан база Казах Республикадан ус-дарганнаашкын уран чүүлүнүң шылгараңгай төлээлерин бир дугаар чыгган, улуг ужур-уткалыг делегей чергелиг шөл болганын регионнуң Баштыңы демдеглээн.
Фестиваль Алтай Республиканың Кош-Агач районунда «Куйактанар» турисчи баазаның девискээринге болуп эрткен. Хемчегниң программазында чаңгыс суугуга демирни шупту эргизери, дарганнаашкынның бурунгу арга-хевирлерин таныштырары, мастер-класстар эрттирери, алтай бижекти каңнап согарынга мөөрей, хол-биле кылган бижектерниң база суй-белектерниң делгелге-садыглаашкыны, ол ышкаш национал оюннар болгаш чогаадыкчы коллективтерниң оюн-көргүзүү кирген.
Фестивальдың аалчылары ус-дарган ажылын чүгле кыдыындан хайгаарап көөр эвес, а арга-дуржулгалыг дагдыныкчыларның удуртулгазы-биле боттарының күжүн шенээр аргалыг болганнар.