Кургаг чаңныктардан республикада арга-арыг өрттериниң көвүдээни-биле Тываның Чазаа арга-арыгларда регионалдыг онза байдалды чарлап, өртке удур тускай чурумну август 18-ке чедир узаткан. Бо үеде республикада 800 ажыг гектар арга-арыг девискээрлеринде 24 өрттер хыппышаан.
«Тываның шупту девискээринде арга-арыгларга регионалдыг онза байдалды чарлаар дугайында шиитпирни хүлээп алдывыс. Арга-арыг яамызы болгаш муниципалдыг тургузуглар бүгү күштерин болгаш курлавырларын демнештирип, сырый харылзаалыг ажылдап турар. Кожа регионнардан база дузаны дилээн бис» - деп, Владислав Ховалыг бодунуң блогунда кызыгаарлаашкыннарны кииргениниң дугайында дыңнаткан.
Республика Баштыңы кожууннар чурттакчыларындан арга-арыгларже үнүүшкүннерни шеглээрин дилээн.
Моолга чорааш, күрүне кызыгаарындан ырак эвесте, Үш-Белдир курортунуң соңгу-чөөн талазында Хувсугул аймактың девискээринде өрт үнгениниң дугайында билип алганын ол дыңнаткан. Тываның девискээринче өрттүң дамчып кээр барымдаазы бар. Ынчангаш Владислав Ховалыг Моолдуң Күрүнениң онза байдалдар талазы-биле агентилелиниң удуртулгазынче ол өрттү дүрген өжүрер айтырыгны шиитпирлээр дилегни кылган. Өрттүң күрүне кызыгаарын кежир нептерээрин болдурбазы-биле хемчеглерни алырын Республиканың чогуур ведомстволарынга база дааскан.
Республиканың Арга-арыг болгаш бойдус ажыглал яамызының дыңнатканы болза, Таңды, Тес-Хем, Чадаана, Шагаан-Арыг, Каа-Хем база Тожунуң дээш, ведомствога хамааржыр арга-арыг ажыл-агыйлар девискээрлеринде өрттер бүрүткеттинген. Колдуунда-ла кургаг чаңныктардан өрттер үнген.
Оларны өжүреринде 181 кижи база 20 санныг техника хаара туттунган. Херек бергедей бээр болза, регионалдыг ХК база ОБ албанының база Тываның онза хайгааралдыг бойдус девискээрлериниң талазы-биле дирекцияның специалистерин киириштирер. Республиканың Арга-арыг яамызының курлавырында 83 кижи база 113 санныг техника база бар.
Тываның авиа арга-арыг камгалалының удуртукчузу Тимур Базыр-оолдуң чугаазы-биле алырга, кожа регионнардан немелде күштер өрттер өжүреринге дузалажып июль 29-та республикага чедип келир. Красноярск край 21, Хакасия 34 кижини чоруткан, а Омскдан 50 хире специалисти хаара тудар чугаалажылга чоруп турар.
«Камгалал ажылдары дүн-хүн дивейн чоруп турар. Росарга-арыг ажыл-агыйының федералдыг курлавырындан бистиң коллегаларывыс вертолеттар база чер кырының транспорттары-биле келир. Олар шупту чогуур дериг-херекселдер болгаш техника-биле хандыртынган» — деп, Тимур Базыр-оол чугаалаан.
Онза чурум үезинде арга-арыгже кирери хоруглуг, ол ышкаш одаг кывыспас, кургаг оът-сиген, бок өрттетпес. Август 18-ке чедир киирген онза байдал чуруму республиканың шупту арга-арыгларынга күштүг.