Тываның найысылалынга 16 харга чедир оолдар болгаш уруглар аразынга баскетболга Тыва Республиканың Баштыңының кубогу дээш маргылдаа эгелээр. Маргылдаа июль 30-ден август 3-ке чедир Сүбедей аттыг спорт школазының спорт залынга болур. Тыва Республиканың чыынды командаларының спортчу белеткел төвү база регионалдыг Баскетбол федерациязы ону организастаан.
Тываның Спорт яамызының дыңнатканы-биле алырга, кубок дээш маргылдаага республиканың шупту кожууннарындан баскетболдуң талалакчыларының командалары, ол ышкаш Моолдуң Увс аймаандан команда киржир. Чагыглар кииргениниң түңнелинде, 12-12 спортчулар кирген 6 херээжен болгаш 9 эр командалар маргылдаага киржир дээш бүрүткеткен.
Маргылдааның бирги чадазының оюннары (бөлүктер аайы-биле оюннар) август 1-ге чедир болур, 1/4 төнчү, чартык төнчү, үшкү чер болгаш тиилелге дээш оюннар август 2-3 хүннеринде планнаттынган.
Шаңналдыг черлер алган командаларга кубоктарны болгаш дипломнарны тыпсыр. Командаларның тренерлери болгаш ойнакчылары медальдарны, сертификаттарны болгаш акша сертификаттарын алыр. Эң эки ойнакчыларга эки халдаашкын, камгалакчы болгаш чараш оюн дээш үш номинацияга сертификаттарны тыпсыр.