Фестивальдың чаңчыл болу берген хороо езулалын Улуг Тиилелгениң 80 чылынга база ТШО-га Россияның тиилелгезин чоокшуладырынга тураскааткан. Езулалдың киржикчилери фестивальдың оймалыындан сарыг шажын хүрээзинге чедир 15 хире километр орукту чадаг эрткен.
Республиканың Баштыңы Владислав Ховалыг бодунуң блогунда езуладың киржикчилери тускай шериг операциязы чедиишкинниг дооступ, дайынчылар онча-менди ээп чанып келири дээш сүзүглеп чүдээнин демдеглээн.
Ол хүн фестивальдың шөлүнге Ада-чурттуң Улуг дайынынга база тускай шериг операциязынга киришкен республика чурттакчыларның 80 чуруун делгеп, бараалгаткан. Чуруктарның автору – республикада билдингир чурукчу Радомир Балган.
«Ол ийи төөгү Тывага онза ужур-уткалыг. Июньнуң 22-де фашистиг Германия ССРЭ-же оор езу-биле халдап киргенден бээр каш-ла шак болганда, 1941 чылда бот-догуннаан күрүне турган Тыва Арат Республика дайынны чарлаанын сагындырарга-ла, чедер. Бөгүнде Украинада тускай шериг операциязы 80 чылдар бурунгаар болган болуушкуннар-биле дөмейлешкек» — деп, фестивальдың оргкомитет удуртукчузу, Тыва Республиканың уран чүүлүнүң алдарлыг ажылдакчызы Игорь Дулуш демдеглээн.
Июль 28-те, фестивальдың бирги хүнүнде, киржикчилер ортузунга конкурс шилилдезин чорудар, 20:00 шакта фестивальдың байырлыг ажыдыышкыны. Бо чылын Альберт Кувезин база «ЯТ-ХА» бөлүү, «Хартыга» рок-бөлүк, «МалышОк» этно-рок-бөлүк, ол ышкаш Британиядан ат-сураглыг джаз болгаш блюз хөгжүмчүзү Рой Янг хедлайнерлер болур.
Июль 30-де, фестивальдың төнчү хүнүнде, гала-концерт үезинде фестивальдың тергииннерин шаңнап-мактаар.