Тыва Республиканың Чазааның доктаалы-биле регионнуң арга-арыгларынга июль 22-ден эгелеп онза байдал чурумун чарлаан. Республиканың Каа-Хем, Тес-Хем болгаш Чеди-Хөл кожууннарынга арга-арыг өрттериниң санының болгаш шөлүнүң улгадып турарындан, үргүлчү кургаг болгаш изиг агаар-бойдустуң турум байдалындан болгаш чурттакчы чонну болгаш девискээрлерни бойдустуң болгаш техногенниг онза байдалдарындан камгалаары-биле хемчегни хүлээп алган.
Тываның Баштыңы Владислав Ховалыг онза байдалдың чурумун дыңнадып тура, регионнуң чурттакчыларын кызыгаарлаашкын хемчеглерин билип көөрүн база арга-арыгларга өртке удур айыыл чок чоруктуң дүрүмнерин сагыырын кыйгырган.
"Бөгүнден эгелеп бүгү Тывага онза байдалдың чурумун киирип турар бис. Арга-арыг өрттериниң улгадып нептерээрин болдурбазы-биле бүгү күжүвүстү болгаш курлавырларывысты мөөңнээр бис. Федералдыг дузаны база хаара тударын планнап турар бис. Мурнунда хүнде Чеди-Хөл, Тес-Хем база Каа-Хем кожууннардан коллегаларывыс тус черниң онза байдалының чурумун киирген” — деп, Республиканың Баштыңы дыңнаткан.
Тываның Арга-арыг болгаш бойдус ажыл-агый яамызының дыңнатканы-биле, 2025 чылдың июль 22-ге чедир республиканың арга-арыг курлавырының девискээринде, ниитизи-биле, 239,2 га шөлде 8 арга-арыг өрттери бар, ооң иштинде 40 га шөлде 1 өрттү өжүрген. Сөөлгү хонукта 15 гектар шөлде 2 арга-арыг өрттери өжүртүнген. Амгы үеде Каа-Хем, Таңды база Тес-Хем кожууннарда өрттер болуп турар.
Бойдустуң өрттерин өжүреринге 115 кижи болгаш 20 техника хаара туттунган. Арга-арыг болгаш бойдус ажыл-агый яамызының курлавырында 108 кижи болгаш 104 техника бар.
Республиканың хамааты камгалал болгаш онза байдалдар албанының дыңнатканы-биле, Эрзин кожуунда V класстың улуг өрт айыылы хевээр арткан, IV класстың өрт айыылы Бай-Тайга, Чеди-Хөл, Кызыл, Таңды база Каа-Хем кожууннарда демдеглеттинип турар.
Онза байдал чурумунуң үезинде регионга хамааржыр арга-арыгларже кирерин долузу-биле хоруп турар. Арга-арыг яамызы кызыгаарлаашкынны хажыткан кижилерни илередир хемчеглерни күштелдирер. Бо үениң дургузунда хоругну үреп, арга-арыгже киргени дээш, 40 муң рубль түңнүг акшадан өрү торгаалга онаажырын албан чери сагындырып турар.