Июль 28-тен 30-ге чедир Чөөн-Хемчик кожуунга болуп эртер дириг хөгжүмнүң болгаш сүзүктүң «Үстүү-Хүрээ-2025» деп делегей чергелиг XXII фестивалын эрттиреринге республикада белеткел ажылдары чоруп турар. Июль 27-де киржикчилер кээп эгелээр. Июль 28-те эртенгиниң 10 шакта чаңчылчаан «Хороо» чыскаалы-биле фестиваль ажыттынар. Организакчыларның демдеглеп турары-биле, бо чылын ол Ада-чурттуң Улуг дайынынга Тиилелгениң 80 чыл оюнга тураскааткан болгаш тускай шериг операциязынга Россияның Тиилелгезин дүрген чоокшуладырынче угланган болур. Кандыг-даа чүдүлгелиг кижилер боттарының чаңчылдарын, мөргүлдерин сагып, ёзулалга киржип болурун онзалап демдеглээн.
Ол-ла хүн 20 шакта фестивальдың байырлыг ажыдыышкыны болур. Ооң соонда мөөрейлиг шилилгелер эгелээш, ол июль 29-та бүдүн хүн дургузунда уламчылаар. Ийиги хүнде 20 шакта шилилгеге көрүкчүлерниң кичээнгейин эң-не хаара туткан киржикчилерниң болгаш жюриниң демдеглээни шыырак бөлүктерниң концерди болур.
Удуртукчуларның дыңнатканы-биле, хемчегниң тускай аалчызы — джаз болгаш блюз хөгжүмчүзү британ Рой Янг болур. Ооң-биле кады Тываның болгаш Россияның өске регионнарындан хөйге билдингир бөлүктер ойнаар. Хемчегниң сөөлгү хүнү июль 30. Ол хүн фестивальдың тергиин киржикчилерин шаңнаар ёзулалдыг Гала-концерт-биле доостур.
«Үстүү-Хүрээ» фестивалын бир дугаар 1999 чылда хөгжүмчү Игорь Дулуштуң саналы-биле эрттиргенин сагындыраал. Фестиваль 1937 чылда үрегдеткен онзагай сарыг шажынның хүрээзи Үстүү-Хүрээниң катап тургустунганынга тураскааткан. Хемчегни эрттирип эгелээн чылдарында аңаа 20 ажыг чурттардан алды муң ажыг киржикчилер болгаш аалчылар келген. Фестивальдың аңгы-аңгы үелеринде көрүкчүлерниң кичээнгейин эң-не хаара тудуп турган киржикчилери: «Sun Ra Arkestra», Сергей Летов, Сайнхо Намчылак, «Kaski», Юрий Наумов, «Хүн Хүртү», «Ят-Ха», Игорь Бутман, Наталья Смирнова, Алвон Джонсон, «Хартыга».
«Үстүү-Хүрээ» фестивалының 20 чыл ою 2019 чылда болган. Ооң эгелекчизи Игорь Дулуш хөгжүмнүң шуулганын уламчылаарынга фестивальдың хевири өскерилгелерлиг болур ужурлуг деп чарлаан. «Бир талазында, фестивальдың хей-аъдын кадагалап арттырар апаар бис, ынчалза-даа хөгжүлдениң чаа чадазынче үнер херек» — деп, хемчегниң кол удуртукчузу ынчан чугаалаан.
Кезек үзүктелиишкин соонда хөгжүмнүң мөөрейин катап диргизер дээн эгелээшкинни Тываның Баштыңы Владислав Ховалыг деткээн. Эрткен чылын 21 дугаар фестиваль болуп эрткен.