Көдээ ажыл-агый адырынга бодунуң ажыл-агыйын ажыдып алыр деп шиитпирлээн тускай шериг операциязының хоочуннарынга федералдыг бюджеттен грант деткимчезин алыр Россияның 10 регионунуң аразынче Тыва кирген. Июль 7-де РФ-тиң “Агромотиватор” федералдыг программаның акша-хөреңгизин хуваарының дугайында сайыттар даргазы Михаил Мишустин оралакчылары-биле хуралының үезинде дыңнаткан.
“Мындыг хемчеглер бистиң дайынчыларывыска боттарының сагыш-сеткилинге кирер ажылын тып алырынга болгаш Россияның субъектилеринге чаа ажылчын олуттар тыптырынга дузалыг” – деп, Чазак Баштыңы демдеглээн.
“Агромотиватор” программазы Россияның Президентизиниң даалгазы-биле тургустунгаш, 2025 чылдан тура ажылдап эгелээн. Ооң мурнунда шак бо сорулгаже 200 сая рубльди аңгылаан. Ону 19 регионче угландырган. РФ-тиң чазааның шиитпири-биле немелде 64,158 сая рубльди база үндүрген.
Мыйыстыг бода малдың эъдин болгаш сүдүн болбаазырадырынче грантының хемчээли 7 сая рубль, а агробүдүрүлге комплекизиниң өске-даа угланыышкыннарынче 5 сая рубль чеде бээр. Грант алыкчыларының шилилгезин регионнарда комиссиялар төлевилелдерни көрүп тургаш кылыр.
Тывага “Агромотиватор” грантыларынга киржир күзелдиглер четчир болур дээрзинге регионнуң Көдээ ажыл-агый яамызы бүзүреп турар. Республикада ТШО хоочуннарының социал керээ дузазы-биле ажыдып алган бүдүрүлгелери ажыттынгаш, чедиишкинниг ажылдап турар. Бии-Хемде Буян Адышаа эът продукциязын бүдүрер цехти ажыткан, а Мөңгүн-Тайгада Айдын Хомушкунуң кадарчыларга демирден янзы-бүрү херекселдер кылыр цеги чоннуң хереглелин тургузуп турар.
“Ада-чурт камгалакчыларының” фондузунуң медээлери-биле алырга, ниитизи-биле 100 ажыг ТШО хоочуннары боттарының хууда ажыл-херээн ажыдып алыр дээш, Тываның Чазааның янзы-бүрү деткимчелерин ажыглаан. Ооң чартыындан хөй кезии көдээ ажыл-агый-биле харылзаалыг төлевилелдер болган. Эрткен неделяда регионнуң “Тываның маадырлары” кадрлар программазынче ТШО-нуң 30 хоочуну болгаш киржикчилери киргенин сагындыраал. Шупту шилилге чадаларны эрткен түңнелинде РФ-тиң Президентизиниң чанында Россияның улусчу ажыл-агый болгаш күрүне албанының академиязының тургускан тускай программазы-биле өөренир эргени алганнар.