«Алаш-Фест» делегей чергелиг дириг хөгжүм фестивалының организакчылары Тывадан, Россияның өске регионнарындан база даштыкы чурттардан беш муң ажыг аалчыларны манап турар.
Фестиваль республиканың Бии-Хем кожуунда «Маралхоз Туран» деп турисчи баазага эрткен чылгы дег июль 5-те болур. Хемчегни ийи дугаар эрттирер, ол ийи хонук уламчылаар. Фестивальды Тываның Баштыңы Владислав Ховалыгның деткимчези-биле алдарлыг «Алаш» бөлүү эрттирер. Ниити деткикчизи – «Эльбрусметалл-литий» компаниязы.
«Алаш-фест» деп бир дугаар дириг хөгжүм фестивалын эрткен чылын «Алаш» бөлүүнүң 25 чыл оюнга тураскаадып эрттиргенин сагындыраал. "Бистиң бөлүүвүс тургустунганындан бээр хөй чурттарны кезип, аңгы-аңгы шөлдерге концерттерни бараалгаткан. Бистиң хөгжүмүвүсте чаа онза күүселделер чонга солун болур дээрзинге бүзүрээр мен" — деп, "Алаш" бөлүктүң кежигүнү, Тываның алдарлыг артизи Аян Ширижик чугаалаан.
Эрткен чылгы фестивальдың онзагай аалчызы Вячеслав Инкижековтуң дирижёрлаан Хакасияның филармониязының симфониктиг оркестри болган. Ук хемчег Тывадан болгаш чурттуң өске-даа регионнарындан 3000 ажыг аалчыларны мөөңнепкен.
Ийи хонуктуң дургузунда «Алаш-Фестке» Тываның алдарлыг улусчу бөлүктери хөгжүмнерин күүседир: Тываның национал оркестри, “Хүн-Хүртү”, “Чиргилчин”, “Тыва”, “Одучу”, “Хөөмей-Бит”, “Тыва кызы”, “Хартыга”, “Амырга-Моос”, “Аян”, “Шу-де”, “Уван-Шу”, «Кара-Суг», «Эзим», «Угулза», ол ышкаш «Азия Төвү» бөлүү. Фестивальдың тускай аалчылары Казахстандан Кенжебек Нурдолдай, «Намгар» бөлүк (Бурятия), «Силензиум» бөлүк (Новосибирск), Юлиана Кривошапкина (Якутия), Сочиден Антон Давидянц биле Ксения Фуркалло, Алексей Самарин (Санкт-Петербург), Стас Нойфелд (Москва) болгаш Моолдан “Метроном” деп рок бөлүк.
Июль 5-те 13.00 шакта «Ус-шеверлер хоорайы» деп мастер-класстардан фестиваль эгелээр. Аалчылар даштан болгаш сөөктен оюп кылыр уран чүүлге, чурулгага, керамикага боттарын шенеп көөр аргалыг болур. Аъттыг аян-чоруктарны организастаар, ооң-биле чергелештир уран чүүл продукциязының делгелгези болгаш садыглаашкыны база болур. Хөгжүмнүг программа 16.00 шакта эгелээр.
Фестивальдың ийиги хүнү июль 6-да дириг хөгжүмнүг эртенги йога-биле эгелээр. 11.00 шактан эгелеп мастер-класстар уламчылаар, аңаа даш-биле чазаар, чуруур, керамика кылырынга болгаш тыва национал хөгжүм херекселдеринге ойнаар мастер-класстар база болур.
Уругларның оюннуг программазы 12.00 шакта эгелээр. Концерт бирги хүнде дег 16.00 шакта эгелээр, 23.00 шакта дискотека-биле доостур.