Тыва «Регион аныяктарга» президент программазындан 110 млн. рубльди алыр. Россияның шупту регионнары киришкен «Аныяктар болгаш уруглар» национал төлевилелди боттандырган Россияның аныяктар мөөрейинге республика тиилээн. Тываның чазааның кииргени аныяктар политиказын хөгжүдер комплекстиг программазы эң экилерниң бирээзи деп үнелелге төлептиг бооп, федералдыг бюджеттен субсидия алыр эргени алган.
Тываның Баштыңы Владислав Ховалыг 2026 чылдың программазы чедиишкинниг камгалаттынганын бодунуң блогунда дыңнаткан. Аныяктар политиказының инфраструктуразын хөгжүдеринге субсидияны ажыглаар: «Сарыг-Сеп биле Мугур-Аксы суурларда амгы тудугларга капитал септелгелерни чоруткаш, ийи чаа аныяктар төвүн тудар. Ак-Довурактың аныяктар эгелээшкиннериниң төвү чаа модульдуг тудугну алыр, а Кызылдың Аныяктар ордузу эт-сеп болгаш дериг-херексел-биле немей дериттинер».
Оон аңгыда, аныяктар политиказының бүгү системазын комплекстиг анализтээр улуг ажылдар чоруттунар. Ындыг хыналдалар мооң мурнунда кажан-даа болбаан. Аныяктар-биле ажылдың байдалын көрүп, ооң эки болгаш кошкак талаларын илередип, боттандырылга айтырыгларын болгаш аныяктарже угланган программалар болгаш төлевилелдерниң дээштиин тодарадыр.
Бо хыналданың түңнелдеринге даянып, эрге-чагырганың аныяктар политиказы херек кырында амыдыралга дүгжүп, аныяктарның сонуургалдарынче чоокшуладырынга удуртулга шиитпирлерин хүлээп алыр. Владислав Ховалыг ажылдарны күштелдирер чамдык угланыышкыннарны - тодаргайлаарга, республиканың ажыл-херээнче болгаш амыдыралынче көдээ аныяктарны оон-даа идепкейлиг хаара тударын, аныяктар политиказының адырынга профессионал удуртукчуларны белеткээрин база аныяк талантыларны деткиириниң хевирлерин калбартырын айыткан.
«Аныяктар болгаш уруглар» национал төлевилел мөөрейинге Тыва бир дугаар эвес тиилеп турар. Республика 2022 чылда аныяктар политиказының талазы-биле боттарының төлевилелдери дээш федералдыг дузаны алган 42 регионнуң санынче кирген. Ооң соонда республика 64,4 млн. рубльди хаара туткан, ону Бии-Хем биле Барыын-Хемчик кожууннарда төптерни ажыдарынга, эки турачы чорукту хөгжүдер төлевилелдерни боттандырарынга, аныяктарның сайгарлыкчы чоруун деткииринге, спорт, культура, өөредилге болгаш эртем адырында эгелээшкиннерни боттандырарынга ажыглаан.