Тыва Республика девискээринде регионалдыг арга-арыгларда онза байдал чурумун киирип, ынаар кирерин бүрүнү-биле хораан. Тываның Чазаа ооң дугайында доктаалды бадылаан.
Республиканың Арга-арыг болгаш бойдус яамызының тайылбырлааны болза, кургаг болгаш изиг агаар арга-арыг өрттериниң саны болгаш ооң девискээри улгаттыканындан ындыг шиитпир хүлээп алдынган. Онза байдал чурумунуң хажыдыкчыларынга кеземче хемчеглерин күштелдирерин ведомство сагындырган. Ылаңгыя ол үеде арга-арыг кирер болза, торгаалдың түңү 40 муң рубль чеде бээр.
Июнь 27-ниң медээлери-биле алырга, эртенгиниң 8 шак 45 минута турда, Тыва Республиканың арга-арыг фондузунуң девискээринде ниитизи-биле 698 га шөлде 4 арга-арыг өрттери демдеглеттинген. Өрттер Чадаана биле Тожу арга-арыг ажыл-агыйларында хып турар. 2025 чылдың өрт сезону эгелээнден бээр ниитизи-биле 7455,86 га шөлге 68 арга-арыг өрттери бүрүткеттинген, оларның 67-зи арга-арыг фондузунуң черлеринге, бирээзи – онза камгалалдыг бойдус девискээринге («Азас» бойдус заповедниги).
Эрткен чылдың бо үезинде сан-чурагайларга деңнээрге, республиканың арга-арыг фондузунуң черлеринде ниитизи-биле 153,50 гектар шөлде 8 арга-арыг өрттери демдеглеттинген. 2024 чылдың өрт сезонунуң ол үезинде, арга-арыг фондузунуң черлеринге ниитизи-биле 673,30 га шөлде 42 арга-арыг өрт хып турган. А бо сезонда өрттерниң саны 1,5 катап, азы 25 таварылгага көвүдээн. Өрттерниң шөлү 11,1 катап өскен, азы 6780,56 га четкен.
Тыва Республиканың онза байдалдарны болдурбас болгаш чайладыр талазы-биле девискээр иштики системазының удуртулга органнарынга болгаш күштеринге онза чурум доктаалда айыттынганы езугаар июнь 25-тен күш кирген. Ол үеде өртке удур айыыл чок чоруктуң немелде негелделерин база киирген. Ылаңгыя, хамаатыларның болгаш транспорт аймааның арга-арыгже кирерин шуут хораан. Күрүне эрге-чагырга органнарының албан-дужаалдыг кижилери, тускай албан черлериниң болгаш тус чер чагырга ажылдакчылары, арга-арыг өртчүлери, эки турачы өртчүлер, рейдилерни чорудуп турар тускай болгаш таңныыл бөлүктеринге ол хамаарышпас.
Республиканың арга-арыг ажыл-агый органнарының, «Азас» база «Убсу-Нур ыйгылаажы» федералдыг заповедниктерниң, аварийлиг-камгалал бригадаларының болгаш өске-даа организацияларның күштери болгаш курлавырлары шыңгыы белеткелче кирген. Хоорай болгаш көдээ чурттакчылыг черлерниң тус чер бот-чагырга органнарынга боттарының девискээрлеринге өрт айыыл чок чоруунуң онза чурумун тургузуп, өртке удур айыыл чок чоруктуң немелде негелделерин ажылдап кылырын сүмелээн.