Кызылга Наркотиктиг бүдүмелдерни ажыглаарынга болгаш хоойлуга удур садыг-саарылгазынга удур бүгү делегей хүнүн деткип, элээн каш хемчеглер эрткен. Республиканың наркология диспансеринге «Ажык эжиктер хүнүн» организастааны кол болуушкуннарның бирээзи болган. Келген кижилер-биле наркоманияны болдурбазынче болгаш аңаа удур демисежиринче ужуражылгаларны, консультацияларны аңаа эрттирген.
Нарколог эмчилер бир хүн дургузунда наркомания-биле холбаалыг айтырыгларлыг 10 кижини шинчээн. Оларның аразындан ийи аарыг кижини чыдып эмнедир кылдыр чоруткан, алды кижиге тускай эмчи тайылбырын берген, ийи хамааты судтуң шиитпири-биле хынадып, чогуур сүмелерни алган.
Республиканың найысылалында Аныяктар сесерлиинге наркоманияга удур «Наркотиктерге удур кады» деп акция эрткен. Ооң сорулгазы наркотиктиг бүдүмелдерге удур аныяктарның болгаш чоннуң кичээнгейин хаара тудары болган.
Тыва Республиканың Кадык камгалал яамызы хемчегни эрттирип, студентилерни болгаш ажылчын аныяктарны темалыг квестче чалаан. Регионнуң кадык камгалал албан черлерин төлээлээн 32 кижиден тургустунган беш команда аңаа киришкен.
Аныяктар акцияда наркомания айтырыгларын сайгарып, хоруглуг бүдүмелдерни ажыглаарынга удур профилактиктиг хемчеглер талазы-биле арга-дуржулгазын солушкан.
Ол ышкаш Кызылдың Арбат шөлүнге Наркотиктиг бүдүмелдерни ажыглаарынга болгаш хоойлуга удур наркотиктиг бүдүмелдер садып-саарарынга удур бүгү делегей хүнүнге тураскааткан хемчегни Республиканың хөй-ниитиниң кадыкшыл болгаш эмчи профилактиказының төвүнүң ажылдакчылары эрттирген. Акцияның киржикчилери болгаш сонуургаан кижилер халас кадыкшылын хынадып, чигир болгаш холестеринин тодарадып, кадыкшылын кадагалаарының талазы-биле эмчилерниң сүмезин алган. Төптүң специалистери амыдыралдың кадык овур-хевирни сагыырын, албаарадыр бүдүмелдерге алзыптарының айыылын, социал болгаш эмчи реабилитациязы-биле тускай мергежилдиглерниң дузазын алырынче угландырган тайылбырны чон ортузунга чорудар.
1987 чылда юнь 26-да КНО-нуң чиңгине Ассамблеязының хүлээп алган доктаалы-биле Наркотиктерге удур делегей хүнүн чылдың-на демдеглеп турар. Бо хүн делегей ниитилежилгези наркотиктиг бүдүмелдерни ажыглаарын болгаш оларны хоойлуга удур садып-саарарын болдурбас дээш күжениишкиннерни салганын онзалап демдеглээр. Эгелээшкинниң сорулгазы – чурттар аразында кады ажылдажылганы быжыглавышаан, профилактика хемчеглерин күштелдирип тургаш, наркоманиядан хостуг делегей чергелиг ниитилелди тургузары.