Бо чылын Тывага аныяктар фестивалы «Бис – чурттуң келир үези бис!» кыйгырыг-биле эртер. Бо болуушкун республиканың шупту аныяктарын каттыштырып, регионнуң амыдыралынга идепкейлиг киржиринге онзагай аргаларны бээр чырыткылыг байырлал болур.
Аныяктар хүнүнүң программазы байлак болгаш хөй талалыг болурун аазап турар. Тываның национал парыгынга Аныяктар фестьивалын ажыдып, аңаа темалыг шөлдерни организастаар. «Билип ал» деп шөлде Россияның «Билиглер» ниитилели күзелдиг кижилерге лекцияларны болгаш мастер-класстарны эрттирип, чаа билиглерни бээр.
«Ынакшы» шөлүнге шопперлер чуруур талазы-биле мастер-класстар база «ажык микрофон» хевиринге мини-концерт болуп эртер. Аныяктарның өг-бүле тудуп бадыланчыр езулалы кичээнгейни хаара тудар, активчи аныяктарга база тергиин ажылдыг аныяктар организацияларынга шаңналдарны тыпсыр.
Республиканың алдарлыг спортчулары-биле ажык белеткелди, тускай шериг операциязының хоочуннарының киржилгези-биле лазер-таг маргылдаазы, чурттуң Маадырлары-биле ужуражылганы «Чоргаарланып чор» деп шөлге эрттирер. Ооң чанынга булуңга Тиилелгениң волонтерлары Ада-чурттуң Улуг дайынының дугайында викторинаны база республиканың чоргааралының демдектерин делгээр.
Билдингир компанияларның киржилгези-биле мергежилдер мастерскаязы, медиа-контент тургузарының зоназы, хакатон, грант эксперттериниң консультация зоназы «Көвүдедип чор» деп темага болур. Оон аңгыда улусчу ус-шевер болгаш уран каасталга продукциязын чогаадып кылыр мастерскаяны база сонуургап болур.
Фестиваль үезинде Доозукчулар аллеязынга ыяштарны олуртуп, хоорайны чүгле ногаанжыдарындан аңгыда, ооң төөгүзүнге исти арттырар арга бар.
Кежээкиниң 18:00 шакта Арат шөлүнге тыва эстрада сылдыстарының киржилгези-биле байырлыг концерт эгелээр.