Республиканың Күш-ажыл болгаш социал политика яамызы Тываның ажыл дилеп турар чурттакчыларын болгаш ажыл берикчилерин бүгү-российжи күш-ажыл ярмарказынга киржиринче кыйгырып тур. Бо пятницада, июнь 27-де 14:00 шактан 18:00 шакка чедир, Кызылда «Сүбедей» универсалдыг спорт комплекизинге бо улуг хемчээлдиг хемчегниң федералдыг чадазы болур. Ооң-биле чергелештир республиканың шупту кожууннар төптеринге база ярмаркалар эртер.
Регионнуң Күш-ажыл яамызының дыңнатканы-биле алырга, хемчегге алды темалыг шөлдерни, ооң иштинде «Россияның ажылы» кадрлар төвүнүң девискээрин, ажыл берикчилериниң шөлүн, өөредилге болгаш конкурс шөлчүгештерин организастаар, ол ышкаш ажыл-биле бот-хандырттынган 20 хамааты продукциязын делгеп, садар.
«Россияда ажыл» кадрлар төвүнүң шөлү чонну ажылга хаара тудар деткимчениң шупту хемчеглерин сүмелеп, Тыва Республиканың ажыл берикчилеринден 1200 ажыг хостуг олуттарны таныштырар. Красноярск крайдан, Калуга база Кемерово областардан ажыл берикчилери хостуг ажылчын олуттарын аңгы-аңгы көргүзер. Аныяктар профугланыышкынныг хемчеглеринге киржир аргалыг. Тываның Өөредилге яамызы чугула херек мергежилдер, психологтуг белеткелдер база профессионал шенелде шөлүн организастаар.
Аңгы-аңгы адырларда амгы үениң мергежилдерин көрүп таныжар кылдыр тускай техника болгаш дериг-херекселдерни аныяктарга бараалгадыр. Ылаңгыя көдээ ажыл-агый, үлетпүр болгаш тудуг адырларында «Кванториум» болгаш «Профессионалитет» өөредилге программаларының шугуму-биле саткан техника аймаан делгээр. Оон аңгыда Росгвардияның кезектери боттарының үлегерлиг техника болгаш дериг-херекселдерин, ИХЯ – корум-чурум хандырар транспорт болгаш дериглерин, Федералдыг Кеземче албаны – тускай техника болгаш камгалал херекселдерин, ол ышкаш ТР-ниң Кадык камгалал яамызы көжүп чоруур эмчи комплекстерин: флюорограф, маммограф, дүрген дуза машиназын көргүзер.
Тыва Республиканың күш-ажыл болгаш социал политика сайыды Эдуард Санданның дыңнатканы-биле алырга, регионда тудуг адыры идепкейлиг хөгжээни-биле холбаштыр, бүгү-российжи ажылчын олуттар ярмарказында улуг тудуг компаниялары киржир. Ажыл дилеп турар кижилер «Восток» КХН, «Регионстрой», «Гостройзаказ» дээш, оон-даа өске организациялардан ажылды тып алыр аргалыг.
Тускай шериг операциязының киржикчилерин болгаш оларның өг-бүле кежигүннерин ажылга хаара тударынче онза кичээнгейни салыр. Республика Баштыңының даалгазы езугаар Тыва Республиканың Чонну ажылга хаара тудар албаны бо угланыышкында идепкейлиг ажылдап, ол бөлүктүң хамаатыларын өөредир, ажылга хаара тудар, деткиир болгаш дуза чедирериниң ниити хемчеглерин боттандырып турар. Дуза дилээн улустуң көвей кезии боттарының ажыл-херээн ажыдарынга деткимчени алган. Бөгүнде оларның аразында 18 хуу сайгарлыкчылар болгаш 22 бот-ажылдакчылар сайзырап турар.
Экономиканың адырларынга, ооң иштинде даг-болбаазырадылгазынга, ылаңгыя «Эльбрусметалл-литий» КХН-ге ажылдаар күзелин илереткен 300 ажыг ТШО киржикчилериниң даңзызын тургускан. Ажылче хаара тудар албан чериниң дыңнатканы-биле алырга, бо бүдүрүлгениң кадрлар килдизи оларны ажылче хүлээп алырынга беленин бадыткаан. Бо чоокку үеде 12 ТШО киржикчилери Тываның тудуг техникумунга өөренгеш, ооң соонда «Эльбрусметалл-литий» КХН-ге ажылга тургустунар.
Күш-ажыл яамызының баш бурунгаар медээзи-биле алырга, «Эльбрусметалл-Литий» КХН, «Лунсин» КХН, «Россети Сибирь Тываэнерго» АН, Россия почтазының Тыва Республика эргелели, «Тардан Голд» КХН база аңгы-аңгы регионалдыг яамылар болгаш оларның чагыргазында албан черлери дээш (культура, спорт, саң-хөө, чурагайлыг хөгжүлде болгаш өске-даа), 40 хире улуг ажыл берикчилери ярмаркага киржип, ажык шилилдени чорудар. Каа-Хемде «Победа» спорт-культура төвүн чүгле ажыглалче кииреринге бөгүнде чүс ажыг кижи херек дээрзин ол тайылбырлаан.
Апрель айда Тывага эрткен ярмарканың регионалдыг чадазынга 7876 кижи, ооң иштинде 4107 ажыл чок кижилер болгаш муң ажыг доозукчулар киришкенин сагындыраал. Ярмарка хүнүнде дорт чугаалажыышкыннарның түңнелинде, 563 кижиге ажылдарны саналдаан, дараазында неделя дургузунда 308 кижи ажылга тургустунган.
«Ярмарканың кол сорулгазы – ажыл дилеп турар кижилерни (ооң иштинде ажылын солуур күзелдиглерни) база мергежилдиг кадрлар хереглеп турар ажыл берикчилерин чаңгыс черге чыыры. Оон аңгыда, долу амыдыралга кедилиг аргалар, өөредилге, деткимче база ниити дуза дугайында кижилерге тайылбырлаары чугула» - деп, хемчегниң организакчылары демдеглээн.