Бөгүн Кызылда Арат шөлүнге «Азия төвүнде фанфарлар» деп V делегей чергелиг фестиваль эгелээр

Тиилелгениң 80 чылынга болгаш Ада-чурт камгалакчызының чылынга тураскааткан.
Фестивальдың эгелээр хүнүн шилип алганы анаа эвес. 1945 чылдың июнь 24-те Москвага бир дугаар Тиилелге парады болуп эрткен. «Фашизм катап база бажын көдүрүп келген амгы үеде бо парадтың ужур-утказы улуг болгаш чугула» - деп организакчылар демдеглээн.
Тыва Республиканың Чазааның Тимур Дулуш аттыг үрер хөгжүм оркестриниң эгелээни фестивальды Тыва Республиканың Чазааның, Россия Федерациязының Камгалал яамызының, «В. Халилов аттыг үрер хөгжүм ниитилели» үрер хөгжүм оркестрлериниң болгаш күүседикчилериниң каттыжыышкыны болгаш Тыва Республиканың Культура яамызының деткимчези-биле эрттирер.
Россия Федерациязының Чепсектиг Күштериниң Шериг оркестр албанының удуртукчузу, кол шериг дирижеру, генерал-майор база Россияның алдарлыг артизи Тимофей Маякин – фестивальдың уран чүүл удуртукчузу.
Фестивальга хүндүлүг аалчылар-биле кады 120 хире кижи киржир. Россия Федерациязының Камгалал яамызының Төп шериг оркестри (ол оркестрниң удуртукчузу – Россияның алдарлыг артизи, полковник Сергей Дурыгин), 55-ки аңгы мото-адыгжы (дагжы) бригаданың шериг оркестри (дирижеру – Пётр Черников) база Кызылдың Президентизиниң кадет училищезиниң шериг оркестри (дирижеру – Тыва Республиканың алдарлыг артизи Саян Салчак) көрүкчүлерге бараан болур.
Июньнуң 26-да Тываның найысылалының чурттакчылары болгаш аалчылары казах эстрада ыраажызы, киноактриса, башкы болгаш профессор, Казахстанның Күш-ажылдың Маадыры Роза Рымбаеваның оюн-көргүзүүн көөр. 1977 чылда Рымбаеваның бүгү-эвилелге адын алдаржыткан Бакир Тажибаев биле Сейдолла Байтерековтуң «Алия» деп ырызы Кызылдың төп шөлүнге Тиилелгениң 80 чылында чаңгыланыр.
Гнесин аттыг Россияның хөгжүм академиязының болгаш Моцартеум университединиң доозукчузу, делегей чергелиг болгаш бүгү-российжи мөөрейлерниң лауреады Фёдор Шагов (туба), Хабаровск епархиязының тускай коңгулууржузу Ольга Кудряшова база орус виртуоз хөгжүмчү, композитор болгаш башкы, валторнеге болгаш альпий рожокка кайгамчык оюну-биле сурагжаан Аркадий Шилклопер - хүндүлүг аалчыларның санында.
Фестивальдың чаңчыл болу берген хемчеглер: Тиилелге шөлүнде Мөңге отка боодал чечектерни салыры, фестивальдың киржикчилериниң плац-концерти база чаңгыстың концерттери болур. Ол ышкаш Ленин кудумчузун дургаар шериг оркестрлерниң база дирижерларның чыскаалы эртер. Программа солун болгаш онзагай болурун аазаан.
Үш хүн дургузунда Арат шөлүнге үрер хөгжүм оркестрлерниң көргүзүглерин көөрү халас.

«Азия төвүнде фанфарлар — 2025» деп үрер хөгжүм оркестрлериниң V делегей чергелиг фестивалының программазы