Тываның Баштыңы Владислав Ховалыг Санкт-Петербургтуң делегейниң экономиктиг форумунуң үезинде Россияның өөредилге сайыды Сергей Кравцов-биле ужурашканын бодунуң блогунда дыңнаткан. Олар республика девискээринде чаа школаларны ажыглалче киирериниң дугайында чугаалашкан.
«Өөредилге» национал төлевилелдиң ачызында, сөөлгү каш чылдарда Тываның найысылында-даа, көдээ черлерде-даа өөредилге инфраструктуразын дүрген сайзырадып, чаартып турар. Чаа школалар туттунуп, ооң-биле чергелештир өөредилге черлеринде капитал септелге ажылдары чоруп турар. Амгы үеде өөредилге объектилерин эде чаартылгазы Тывага кажан-даа туруп көрбээн темп-биле чоруп турар.
Чүгле сөөлгү үш чылда республикада 46 школага капитал септлгени кылып, чаа дериг-херекселдер-биле хандырган. Алды чаа школа туттунган, оларның дөртүн эрткен чылын ажыглалче киирген: Балгазын биле Сукпак суурларда база Кызылдың Бай-Хаакская кудумчузунда болгаш Вавилин ээтпээнде школалар-дыр. Россияның Президентизи Владимир Путинниң эгелээшкини-биле «Аныяктар болгаш уруглар» деп чаа национал төлевилелдиң «Уругларга бүгү-ле экини» федералдыг төлевилелиниң күүселдези-биле өөредилге инфраструктуразының объектилериниң чаартылгазы 2025 чылда уламчылаар.
"Бо күзүн Кызылда база Тываның чамдык кожууннарында чаа улуг школалар ажыттынар. Россияның Чазааның болгаш Өөредилге яамызының деткимчези-биле ажы-төлүвүске таарымчалыг байдалдарны тургузуп турар бис" - деп, Владислав Ховалыг сайыт-биле ужуражылга соонда демдеглээн.
Чаа өөредилге чылында бүрээзинде-ле 825 олуттуг дөрт чаа школа уругларны хүлээп алырынга белеткенип турарын айтыылы, ол дээрге Тываның найысылалында ийи, Кызыл биле Таңды кожууннарда ийи школа-дыр. Бөгүнде документилери-биле ажылдар дооступ турар. Чыл төнчүзүнге чедир ам-даа үш объектиниң тудуу доостур. Оларның бирээзи Мөңгүн-Тайга кожууннуң ыраккы Кызыл-Хая суурда.
Владислав Ховалыг депутаттарга Айтыкалында, 11 чаа өөредилге организациялары республикага сес муң ажыг олуттарны немей хандырарын демдеглээн.
База ол ышкаш бо чылын Президентиниң даалгазы-биле «Аныяктар болгаш уруглар» база «Өг-бүле» деп чаа национал төлевилелдер боттандырылгазы-биле Туран хоорайга школа, Кызыл хоорайга уруглар садының тудуу эгелээн. А 2027 чылга чедир уруглар садтарының капиталдыг септелгезиниң чаа программазы-биле Тывада база 22 өөредилге объектилерин бүрүнү-биле септеп чаартыр.