Санкт-Петербургтуң делегей чергелиг экономиктиг форумунуң үезинде Тыва Республиканың Чазаа биле «Альфа-Банк» акционерлиг ниитилелдиң аразында кады ажылдажылга дугуржулгазынга атты салыр езулал болган. Ийи таланың дугуржулганың темазы – Республиканың социал-экономиктиг хөгжүлдезиниң мурнады боттандырар сорулгаларын шиитпирлээри болган. Регионнуң Баштыңы Владислав Ховалыг база «Альфа-Банк» АН-ның директорлар чөвүлелиниң даргазы Олег Сысуев документиге атты салган.
Чээли албан чериниң директорлар даргазы Олег Сысуев республиканың Баштыңы Владислав Ховалыг-биле ужуражылга үезинде, банк регионга ажыл-чорудулгазын ам-даа калбартыр сорулгалыын дыңнаткан. Тыва Республикада Альфа-Банкының бирги офизи эрткен чылдың декабрьда ажылдап эгелээн. Хөй янзы саң-хөө болгаш чээли аргаларының ачызында, регионнуң чурттакчы чонунга банкының ачы-дузазы аажок нептереңгей апарган.
«Альфа-Банк»-биле дугуржулгага атты салыры – регионнуң рыногунда банк ачы-дузазын калбартырынга эки арга деп Владислав Ховалыг демдеглээн. Ол дээрге башкарыкчы банкыларның регионнуң экономиктиг өзүлдезиниң болгаш чурттакчыларының чаагай чоруунуң перспективаларын көрүп турарының көргүзүү-дүр.
Ооң-биле чергелештир банк корпоративтиг клиентилерже, бизнести болгаш сайгарлыкчыларны деткииринче, чурагай технологияларын хөгжүдеринче угландыр көөрү база чугула дээрзин республика Баштыңы онзалап демдеглээн.
Владислав Ховалыг чаа чурагай аргаларның шугуму-биле чурттакчы чоннуң-даа, биче болгаш ортумак сайгарлыкчы чоруктуң төлээлериниң-даа ортузунга саң-хөө билиглерин нептередиринге, банкы болгаш саң-хөө адырларынга шыырак кадрларны белеткээринче база кичээнгейни угландырарын саналдаан.
«Банкының чугаалажыышкынга беленин үнелеп, үр хуусаалыг чыылда программазын нептередирин, чурттакчы чоннуң саң-хөө билиглерин бедидер болгаш инвестицияны хаара тудар дээн ышкаш кады боттандырар төлевилелдеривис Тыва Республиканың социал-экономиктиг хөгжүлдезинге улуг идиглиг апаар дээрзинге бүзүрээр бис» - деп, Баштың чугаалаан.
Ужуражылганың түңнелинде Владислав Ховалыг моон соңгааргы кады ажылдажылганы тодаргай чугаалажыры-биле Олег Сысуевти Тываже чалаан.
Альфа-Банк Россияның регионнарында болгаш ХКД чурттарында салбырлары болгаш төлээлекчилер четкизи бар, ол ышкаш Кипрде, Великобританияда, Нидерландыда болгаш АКШ-та төлээлеттинген. Ол 200 муң хире компанияны болгаш 14 миллион хире кижилерни хандырып турар. Россия Федерациязында клиентилер-биле ажылдаар 861 банк салбырлары бар.