Июньнуң 21-22 хүннеринде Кызылга Тыва Республиканың Тудуг яамызының организастааны-биле 10:00 шактан 16:00 шакка чедир чиигелделиг ипотекалыг чуртталга бажыңнарының ярмарказы болуп эртер. Ярмаркага келген аалчылар регионда бүзүрелдиг сайгарлыкчылардан болгаш өнчү-хөреңги агентилелдеринден саналдарны көрүп болур. Аңаа чедингир болгаш таарымчалыг инвестиция-биле боттуң квартиразын садып ап, чылда чүгле 2 хуулуг ипотеканы долдуртуп алыр арга бар. Ам мындыг ярмаркалар Кызылга дыштаныр хүннерде, неделя санында болуп эртер.
Тывада ийи чыл бурунгаар эгелээн чиигелделиг ипотека чээлизиниң күрүне программазы-биле таарымчалыг ставка-биле 2827 керээ чардынган. Программа таарымчалыг чурттаар оран-сава айтырыын таарымчалыг шиитпирлээрин элээн чиигедип, хамаатыларның амыдырал байдалын экижидер аргалыг. Чиигелделиг ипотека чээлизиниң программазын ажыглаарынга чедир эвээш үе арканын сагындырып каалыңар: ону алыр күзелдиг улуска алды ай арткан.
2025 чылдың эгезинден бээр Тыва Республикада 460 хире өг-бүле чиигелделиг өг-бүле ипотеказын ниитизи-биле 2 млрд ажыг рубльге алган. Регион бо чылын 1000 керээни чарар.
Регионалдыг программаның онзагай чүүлү - ажы-төлдүг өг-бүлелерге чылда чүгле 2 хуулуг чээлини берип турар. 2024 чылда республикага Россияның Президентизи Владимир Путинниң келгениниң соонда, Тываның Баштыңы Владислав Ховалыгның чиигелделиг ипотека чээлизиниң программазын узадыр дугайында эгелээшкинин деткип, тускай шиитпирни үндүргенинден таарымчалыг арганы ажыглаар арга тургустунган.
Программаның кол негелделернден аңгыда, республиканың дөрт хоорайы – Чадаана, Туран, Шагаан-Арыг база Ак-Довурактың чурттакчыларынга немелде аргаларны база берген. Айыткан черлерниң чурттакчылары чүгле чаа тудуглардан эвес, а ийи дугаар рыноктан бажыңнарны садып алыр эргелиг апарган. Ындыг болзажок, бажыңнарны тутканындан бээр 20 чыл эртпээн болур ужурлуг, ол ышкаш аварийлиг тудуглар реестринче кирбээн база чурттаарынга таарымчалыг болур ужурлуг. Ындыг садыглажыышкын дээш чылда 6 хуулуг тускай ставканы салган.