Бөгүн Тывада химия, төөгү, литература, математика болгаш орус дыл эртемнериниң шылгалдаларының түңнелдери билдинген. Амдыызында Тываның өөредилге черлериниң дөрт доозукчузу эң хөй баллдарны алганы билдингир. Кызылдың №9 гимназиязының өөреникчизи Ай-Шуру Белек-оол, Таңды кожууннуң Сосновка суурда ортумак школаның доозукчузу Адыгжы Оюн база Кызылдың 5 дугаар гимназиязындан Тахир Ондар химияга Чаңгыс аай күрүне шылгалдазын 100 баллга база Совет Эвилелиниң Маадыры Михаил Бухтуев аттыг 1 дугаар школаның доозукчузу Субудай Куулар орус дылды 100 баллга дужаап алганнар. Тываның күрүне лицеиниң доозукчузу Аюна Херек биле Кызылдың ПКУ курсантызы Кежик Монгуш химияга 99 балл болганнар.
80 өөреникчи, оларның хөй кезии республиканың көдээ школаларының доозукчулары орус дылга бедик баллдарны алган. Тываның Баштыңы Владислав Ховалыг социал четкилерде бодунуң блогунда ону демдеглээш, шылгараан оолдар, кыстарга байырын чедирген. «Шылгалдаларның эки демдектери бистиң 11-ги классчыларывыска бодунуң мергежилин, күзээни дээди өөредилге черин шилип алырынга дузалаар дээрзинге бүзүрээр мен» - деп, ол демдеглээн.
Бо неделяда республикада Чаңгыс аай күрүне шылгалдазын дужаарының курлавыр хүннери уламчылап турар. Июньнуң 16-да география, литература, ниитилел болгаш физика эртемнерин 151 кижи: литератураны – 8 кижи, физиканы – 15, географияны – 19, ниитилел билиглерин – 109 доозукчу дужааган. 114 доозукчу июньнуң 17-де орус дылды дужааган. Июньнуң 18-те Кызылдың 19 дугаар школазында 95 дугаарлыг шылгалда пунктузунга төөгү, химия болгаш англи дыл (аас кезээ) шылгалдалар эрткен. 51 доозукчу шылгалдага киришкен. Июнь 19-та биология, даштыкы дыл (бижимел кезээ) база информатика талазы-биле шылгалдаларны дужааган.
Чаңгыс аай күрүне шылгалдазын дужаарынга Күрүнениң түңнел аттестациязының кол үезиниң курлавыр хүннери июнь 16-дан 23-ке чедир үргүлчүлээр. Оон аңгыда доозукчуларга шылгалда катап дужаарынга ийи хүннү немей тускайлаан – бо удаада июльдуң 3 биле 4-тү. Россияның Президентизи Владимир Путинниң сүмелээни-биле бо хүннерни эрткен чылын киирген. Ооң мурнунда шылгалданың түңнели багай болганда катап дужаар турган болза, ам – көргүзүүн экижидер күзел бар болза, катап дужаап ап болур. Ындыг болзажок, катап дужааганы чаа демдек бижиттинер, а эрги баллдарны ап кааптырын биле чогуур.
Республиканың школаларында шылгалдалар дужаарының чуруму езугаар, технологтуг частырыглар болгаш чурум хажыдыышкыннары чокка эртип турарын Өөредилге яамызы дыңнаткан. Регионнуң доозукчу класстарының 9,8 муң хире өөреникчи шылгалдаларда киржип турар, оларның 7 муң хирези 9-ку классчылар. Чаңгыс аай күрүне шылгалдаларын 2,5 муң ажыг доозукчу дужааган.