Тываның эрге-чагыргазы «Мегафон» компаниязы-биле республиканың мобильдиг харылзаа болгаш чурагайжыдылга инфраструктуразын калбартыр талазы-биле кады ажылдаарын дугурушкан. Санкт-Петербургтуң делегейниң экономиктиг форумунуң шөлүнге Тываның Баштыңы Владислав Ховалыг база телекомоператорнуң чиңгине директору Хачатур Помбухчан ооң дугайында дугуржулгага атты салганнар.
«Мегафон» эң-не биче болгаш ырак суурларга бедик шынарлыг мобильдиг харылзааны нептередип, ооң дамчыдылга девискээрин улгаттырар. Владислав Ховалыгның бодунуң блогунда дыңнатканы-биле алырга, компания оон аңгыда, экономиканың аңгы-аңгы адырларын чурагайжыдары-биле холбашкан шенелде төлевилелдерни республика чазааның деткимчезинде боттандырар планныг.
Хачатур Помбухчан дугуржулганы тайылбырлап тура, компанияның туризм инфраструктуразының хөгжүлдезинге киржир планнарын чугаалаан, ылаңгыя ооң чарылбас кезээ – шынарлыг харылзаа дугайында. Ооң чугаазы-биле алырга, Тыва туристерни бодунуң онзагай культуразы-биле хаара тудуп турар, а «Мегафонуң» сорулгазы – республиканың кайы-даа булуңунга аян-чорукчуларның дыштанылгазын таарымчалыг болгаш айыыл чок болдурары.
Оператор LTE-ниң немелде шугумун - чаа шөйген оптиктиг-удазын харылзаа шугумнары дамчыштыр харылзааның девискээрин болгаш ооң дүргенин улгаттырар технологияны калбартыр планныг.
«Мегафоннуң» удуртукчузу Тываның эрге-чагыргазынга чүгле туризмни эвес, ниитизи-биле экономиканы чедимчелиг хөгжүдер ужурлуг big data технология дугайында сагындырган. Мобильдиг херекселдерден хөй санныг медээлерни чыып, сайгарып турар провайдерлерниң ажыглап турары ачы-дузалар дугайында чугааны чоруткан. Олар аян-чорукчуларның шимчээшкинин хайгаарап, турисчи агымның дугайында бодалды, тодаргай маршруттарның, аалчылар доктаар черлерниң болгаш өске-даа объектилерниң кайы хире херектиг болганын үнелээр. Алган медээ чүгле туроператорларның ажылын шуудадырынга эвес, а регион деңнелинге чижээлээрге, сезоннуң кайы үезинде немелде кандыг авиарейстер херегил, өске турисчи төптү азы аалчылар бажыңын каяа тудары дээш, оон-даа өске шиитпирлерни хүлээп алырынга дузалаар.
«Мегафон» Тываның эң ыраккы суурларынче бодунуң коммуникациязын нептередир арга-дуржулгазы бар. Чижээлээрге, компания каш чыл бурунгаар 2G харылзааны республиканың эң ыраккы кожууннарының бирээзи – Тываның найысылалындан 6 шак чоруп кээр Мөңгүн-Тайгаже шөйген.
Тывада Мөңгүн-Тайга ышкаш девискээрлер ам-даа бар, эвээш дизе 13 суур чедери кызыгаарлаттынган деп санаттынып турар. Ажык медээлерниң дыңнатканы-биле алырга, бөгүнде «Мегафоннуң» 4G четкизи республиканың чурттакчылыг девискээриниң 90 хире хуузун ээлеп турар. Ынчангаш хандырылгаларның өске-даа ачы-дузазын калбартыр арга компанияда бар.