Тыва Беларусь-биле найыралчы болгаш ажыл-агыйжы харылзааларны ам-даа хөгжүдер. Июнь 18-те «Экспофорумга» эгелээн Санкт-Петербургтуң делегей чергелиг экономиктиг форумунуң үезинде, Тываның Баштыңы Владислав Ховалыг акы-дуңмалышкы республиканың делегациязы-биле ужурашкан.
2021 чылда ийи республиканың кады ажылдажылгазы эгелээн дээрзин сагындыраал. Ооң соонда, Красноярск хоорайда Беларусь Республиканың элчин чериниң салбырының удуртукчузу албан-дужаалды ээлеп турган Александр Позняк баштаан Белоруссиядан делегация Тывага аалдап келген. Делегацияның составы-биле «Красноярск-Белаз Сервис» компанияның төлээлери база кээп чораан.
Тываның албан езузунуң делегациязы 2022 чылдың январьда Беларуссияже ажыл албан аайы-биле аалдап четкен. Беларусьтуң Президентизи Александр Лукашенко база Гродно облазының күүсекчи комитединиң даргазы Владимир Караник-биле ужуражылгалар болуп эрткен.
Баштай областың күүсекчи комитединиң даргазы, ооң соонда Чазак Даргазының оралакчызы Владимир Караник оон бээр-ле Тыва-биле кады ажылдажылганы харыылап турган. Амгы үеде ол Белоруссияның Национал эртемнер академиязының президиум даргазының албан-дужаалга ажылдап турар, а ооң мурнунда ооң албан хүлээлгелерин Беларусь Республиканың стандартизация талазы-биле күрүне комитединиң даргазы Елена Моргуновага дамчыткан.
Беларусьтуң стандартизация талазы-биле күрүне комитеди стандартизация, метрология, аккредитация болгаш энергияның шынарлыг ажыглалының талазы-биле делегейниң болгаш регионалдыг организацияларның ажылынга киржип турар. Совет үе соонда, девискээрде интеграция каттыжыышкыннарының — ЕАЭС биле ХКД иштинде техниктиг чурумчудулга талазы-биле ажылга идепкейлиг киржип турар. 35 ажыг чурттар-биле делегей чергелиг дугуржулгаларны боттандырар дээш ийи талалыг ажыл-агыйжы харылзаалар хөгжүлдеде.
Владислав Ховалыг Белоруссиядан келген чаа куратор Елена Моргунова-биле Санкт-Петербург форумунга ужурашкан. Ийи тала бот-боттарынга ажыктыг кады ажылдажылганы уламчылаар күзелин илереткен. Кады ажылдың мурнады көөр угланыышкыннарын тодараткан. Бо чоокку үеде Тывага оларны тодаргай чугаалажыр дээн ужуражылгага Моргунова б бизнес-делегация-биле чеде бээринге беленин чугаалаан.
«Беларусь Республиканың делегациязы яамылар болгаш ведомстволар деңнелинге харылзааны тургузуп, бистиң чуртувустуң, аңаа дүүштүр Тыва Республиканың хөгжүлдезинге боттуг үлүүн киириштирер айтырыгларны сайгарары-биле август айда республиканың национал байырлалында Тываже аалдап чедер деп шиитпирлээн» - деп, Моргунова чугаалаан.
Владислав Ховалыг ужуражылга Улуг Тиилелгениң 80 чыл оюнда болуп турарын демдеглээн. «Ада-чурттуң Улуг дайынының үезинде мөчээн дайынчыларның тураскаалын кадагалап арттырганы дээш, ылаңгыя Тываның үндезин чурттакчызы, Совет Эвилелиниң Маадыры Михаил Бухтуевтиң тураскаалын карактап чорууру дээш Беларусьтуң чонунга четтиргенимни илереттим» - деп, регионнуң баштыңы социал четкилерде бодунуң блогунда бижээн.
2023 чылда Уфа хоорайга эрткен Россияның болгаш Беларусьтуң регионнарының форум үезинде, Тыва Республиканың Чазаа биле Беларусь Республиканың Чазааның аразында садыг-экономиктиг, эртем-техниктиг болгаш социал-культурлуг кады ажылдажылга дугайында дугуржулганы чарганын сагындыраал.
Эрткен чылдың июнь эгезинде, Санкт-Петербургтуң делегейниң экономиктиг форумунга Владислав Ховалыг биле Белоруссияның Гродно облазының күүсекчи комитединиң даргазының оралакчызы Виталий Невераның аразында ажылчын ужуражылга болган. Ийи тала Беларусьтан Тываже мал ажыл-агыйынга херек ветеринарлыг вакциналар-биле хандырылганың чедиишкинниг арга-дуржулгазын барымдаалап, көдээ ажыл-агый талазы-биле кады ажылдажылганы хөгжүдерин дугурушкан.
А 2024 чылдың июнь 26-дан 28-ке чедир Беларусь Республиканың Гродно облазынга бизнес-миссия болуп эрткен. Ооң шугуму-биле бүдүрүлгелерже үнүүшкүннерни, агроүлетпүр компанияларының төлээлери-биле ужуражылгаларны организастаан.
Россия Федерациязының Тыва Республика биле Беларусь Республиканың аразында күштүг дугуржулганы күүседириниң план төлевилелинге дугуржулга ажылдары амгы үеде чоруп турар.