Тываның найысылалы Кызыл хоорайда муниципалдыг тургузуглар хоочуннарының эр болгаш херээжен командаларының аразынга Тываның Баштыңының кубогу дээш волейбол маргылдаалары эгелээн. Бо чылын ол маргылдаа Ада-чурттуң Улуг дайынынга Тиилелгениң 80 чылынга болгаш Тыва Республиканың Баштыңының кубогунуң 30 чыл оюнга тураскааттынган.
Июнь 19-та, олимпийжи белеткел төвүнге мандат комитеди ажылдаан. Регионнуң Спорт яамызының медээзи-биле алырга, июнь 10-га чедир кожууннарга эрткен муниципалдыг маргылдааларга шилиттинген республиканың аңгы-аңгы суурларындан болгаш хоорайларындан 54 команда маргылдаага киржирин баш бурунгаар чарлаан. Оюннар назы-хар аайы-биле ийи бөлүкке эртер: 40 харга чедир, аңаа 15 эр, 13 херээжен командалар ойнаар, а 50 хардан өрү назылыг киржикчилер аразынга 12 эр, 14 херээжен командалар ужуражыр.
Маргылдаалар ийи шөлге – «Субедей» спорт школазынга болгаш Кызылдың № 17 школазының спорт залынга эгелээр. Шенелде болгаш чартык төнчү оюннар июнь 20 биле 21-де болур болза, сөөлгү оюннар – июнь 22-де.
Бирги, ийиги, үшкү черлер алган командаларга дипломнар, сертификаттар, медальдар база акша шаңналдарын тыпсыр.
Тыва Республиканың Баштыңының кубогу дээш муниципалитеттерниң эр болгаш херээжен хоочун командаларының аразынга волейбол маргылдаалары чурттакчы чон ортузунга кадык амыдыралды нептередиринче, хамаатыларны күш-культура болгаш спортче доктаамал хаара тударынче, шыырак спортчуларны болгаш командаларны тодарадырынче, ол ышкаш элээдилер ортузунга волейболду нептередиринче угланган.