Уруглар өөредилге албан черлеринче орук шимчээшкининиң айыыл чок чоруун хандырары – регионнуң орук-транспорт яамызының ажылының мурнады боттандырар угланыышкыны. Республикада оруктарның элээн каш участоктарын септеп турар «Амыдыралга инфраструктура» национал төлевилели-биле өөредилге черлериниң чоогунга орук озал-ондаа бооп болур черлерни экижидер ажылдарны чорудуп турар.
Бо чылын Тывада 156 километр ниити узун оруктарның 33 участогун, ооң иштинде школаларже кирер оруктарны чогуур байдалче киирерин планнаан. Чижээ, Улуг-Хем кожууннуң Чодураа суурнуң кол кудумчузунуң оруун, ол ышкаш чаа школаже баар 2,78 км узун орукту септээр. «Тыва Республиканың транспорт системазын хөгжүдери» күрүне программазы-биле ажылды «ДСТ» КХН кылыр. Ноябрь төнчүзүнге чедир бүгү ажылдарны доозары планнаттынган-даа болза, орук-тудуг чери чаа школа ажыдыышкынынга чедир орукту септеп доозарын аазаан.
Кызыл хоорайның Вавилин ээтпээ микрорайонунда хөй-ниити транспортунуң маршруттары чоруткан база Ада-чурттуң Маадырлары аттыг 20 дугаар школа чедер «Кызыл – Кара-Хаак» оруун септеп турар. Оон аңгыда хоорайның микрорайоннарын каттыштырган Колхозная кудумчузунуң оруу база септелгеде. Ол оруктап Интернационалчы дайынчылар аттыг 12 дугаар школаның автобустары биле хөй-ниити транспорттары халдып турар.
Планда Кызыл кожууннуң Каа-Хем суурда база Чадаана хоорайда бо күзүн ажыглалче кирер чаа школаларынче чедер оруктарны чаагайжыдары көрдүнген.
Эрткен чылын Кызыл хоорайда, Сукпак, Балгазын база Кара-Хаак суурларда беш чаа школаже чедер оруктарны септеп селээн.
«Амыдыралга инфраструктура» национал төлевилели-биле 2025 чылда Россияда уруглар садтары, школалар база өске-даа өөредилге черлеринче чедер регионалдыг болгаш тус черлерниң шупту 3 муң хире километр оруктарын чогумчалыг байдалче киир кылган. Оруктар септелгези уругларга айыыл чок чорукту, ада-иелер болгаш башкыларга таарымчалыг байдалы магадылаар. Объектилерни көвей кезии чаа өөредилге чылынга чедир дужааттынар.