Россия Федерациязының Хөй-ниити палатазының чоннар, шажыннар аразында харылзаалар болгаш миграция талазы-биле комиссияның даргазы Владимир Зорин болгаш Айыыл чок чорук болгаш хөй-ниитиниң хайгаарал комиссиялары-биле кады ажылдажылга комиссиязының даргазы Михаил Аничкин баштаан делегация Кызылда чедип келген. Ажылчын сургакчылаашкынның кол сорулгазы – Россия Федерациязының Хөй-ниити палатазы база Тыва Республиканың Хөй-ниити палатазының комиссиялары КХО-биле кады айыыл чок чорук болгаш чоннар, шажыннар аразында харылзаа база миграция айтырыгларынга Тыва Республиканың күүсекчи эрге-чагырга органнары, депутаттары, хөй-ниити ажылдакчылары киришкен үнүүшкүннүг хуралын эрттирери болур.
РФ-тиң Хөй-ниити палатазының делегациязы ажылчын үнүүшкүннер үезинде, Тыва Республиканың Чазааның, Тыва Республиканың Дээди Хуралының (праламентизиниң), корум-чурум камгалаар органнарның болгаш республиканың хөй-ниити организацияларының төлээлери-биле элээн каш ужуражылгаларны болгаш хуралдарны эрттирер.
Бөгүн Тываның Чазаанга Тыва Республиканың Чазааның даргазының оралакчызының албан хүлээлгезин күүседип турар Айдыс Сынаа-биле делегация кежигүннери ужурашкаш, хөй-ниити айыыл чок чоруун хандырарының, ол ышкаш “Шенээшкин дугайында” федералдыг хоойлу дүрүмнерин боттандырарын чугаалашкан.
Июньнуң 19-та, делегация кежигүннери “Чоннуң чаңгыс деми – Россияның күжү” регионнар аразының шуулганынга киржир. Шуулган үезинде национал айыыл чок чоруктуң үндезиннери болур чоннар болгаш шажын чүдүлгелер аразында харылзаа болгаш сагыш-сеткил-мөзү-бүдүш үнелиг чүүлдериниң адырында российжи ниитилелде чугула айтырыгларны болгаш угланыышкыннарны ажык сайгарып чугаалажыр. Шуулганның киржикчилеринге экстремизмге удур профилактика болгаш аныяктар ортузунга терроризмни болдурбазының талазы-биле тускай сессия ажылдаар.
- Бо дээрге ажылчын үнүүшкүн-дүр. Ол элээн каш үндезиннерлиг. Комиссияның кежигүн бүрүзү бодунуң угланыышкыннарынга ажылдап, чугаалажыр. Ынчалза-даа эң чугула болуушкун – регионнар аразында шуулганның эртип турары. Федералдыг округтарда Хөй-ниити палатазының ниитилелдер шуулганнары эки арга-дуржулгаларны чедип алганы билдингир. Ынчангаш элээн каш чылдагааннар-биле бо чылын оларны эрттирбээн. Тывада үш регион киржир регионнар аразының шуулганының чаа моделин шенээр бис. Хамааты ниитилелдиң бөгүн шиитпирлеп турары кол айтырыы – бистиң чуртувустуң чоннар аразында демнежилгезин, күрүневистиң чедиишкинин, тиилелгезин, бот-догуннаашкынын быжыглаарының дугайында чугаалажыр бис – деп, РФ-тиң Хөй-ниити палатазының чоннар, шажыннар аразында харылзаалар болгаш миграция талазы-биле комиссия даргазы Владимир Зорин хуралга хамаарыштыр чугаалаан.
РФ-тиң Хөй-ниити палатазының кежигүннериниң Тывага чораан үезинде, республиканың шажын-чүдүлге төлээлери – Орус Православ хүрээниң Кызыл Епархиязы база Тыва Республиканың Камбы-Лама эргелели ужуражыр. Шажын чүдүлгелер аразында харылзаа айтырыгларын шажынчы ниитилелдер төлээлери-биле сайгарар.
Оон аңгыда Россия Федерациязының Хөй-ниити палатазының кежигүннери Тыва Республикада кижиниң эргелериниң талазы-биле бүрүн эргелиг төлээзи, Россия Федерациязының Юстиция яамызының Тыва Республика талазы-биле эргелели-биле ажылчын ужуражылгалар эртер.
«Ада-чурт камгалакчылары» фондунуң регионалдыг салбырының баазазынга Хөй-ниити ажылдакчыларының киржилгези-биле ТШО киржикчилеринге болгаш хоочуннарынга база оларның өг-бүле кежигүннеринге күрүнеден деткимче хемчеглерин боттандырарының талазы-биле үнүүшкүннүг хуралды эрттирер.
РФ-тиң Хөй-ниити палатазының кежигүннериниң киржилгези-биле регионнуң чазаанга, Россия Федерациязының Чепсектиг Күштеринден, иштики херектер органнарындан болгаш өске-даа тускай албаннардан халашкан хамаатыларга профессионал эде белеткел болгаш социал реабилитация программаларын ажылдап кылыр болгаш боттандырарының талазы-биле хурал болуп эртер, аңаа республика хамаатыларының шупту категорияларынга амгы үеде күштүг ресоциализация болгаш психологтуг реабилитация хевирлери-биле таныштырган хурал болур.
Үнүүшкүннүң төнчүзүнде, Россия Федерациязының Хөй-ниити палатазының комиссиялары Тыва Республиканың Хөй-ниити палатазының база Тыва Республиканың Хөй-ниити хайгаарал комиссиязының удуртулгазы-биле кады ажылдаанының түңнелдерин үндүрген хуралды эрттирер.