Тываның Баштыңы Владислав Ховалыг июнь 18-те “Экспофорумда” ажыттынган болгаш, июнь 21-ге чедир уламчылаар Петербургтуң делегейниң экономиктиг шуулганының ажылында киржип турар. Аалчы кылдыр Бахрейнниң хаан чурту киришкен шуулганның темазы – «Ниити үнелиг чүүлдер — хөй талалыг делегейде өзүлдениң үндезини».Шуулган ажылының баштайгы түңнелдери көстүп келген. Регионнуң баштыңы социал четкилерде бодунуң албан езузунуң блогунда, Россияның аъш-чем садар мурнакчы компанияларының бирээзи — «Х5 Group» компаниязы-биле кады ажылдажылга дугуржулгазын чарганын дыңнаткан. «Х5 Group» бөлүктүң «Пятерочка» садыг четкизи Кызылда ажылдап турарын сагындыраал. Садыг полкаларында колдуунда федералдыг бүдүрүкчүлерниң продукциязын садып турар, ынчалза-даа ооң-биле чергелештир республика чурттакчыларының сонуургалдарын барымдаалап, «фреш» категорияже кичээнгейни угландырып, тус чер бараан бүдүрүкчүлериниң үлүүн көвүдедир сорулганы салган.
Компанияның күрүне албан черлери-биле харылзаа тудар директору Василий Пушкин-биле хемчеглер планын чугаалашкан. Тываның Баштыңы бөлүкте солун болгаш ажыктыг төлевилелдер барын, чижээлээрге, школачыларже угланган кадык болгаш шын чемненилгени организастаарының дугайында демдеглээн.
Тывада амгы үеде федералдыг четкилер-биле чедиишкинниг ажылдап турар бүдүрүкчүлер бар, ол чүүл тус черниң барааннарының хереглелдиин болгаш чижилгелиин бадыткаан. «Бис амгы үениң хереглекчилеринге нептереңгей – холуксаа чок арыг болгаш онза шынарлыг продукция хевирлерин калбартырынга белен бис» - деп, Баштың демдеглээн.
Тус черниң бүдүрүлгелери продукция-биле чүгле хандырар эвес, а бүзүрелдиг партнерлар болурун, ону республиканың чазаа сертификат бээри, логистика болгаш федералдыг четки стандарттарынга белеткээри дээн ышкаш, бүгү талалыг деткимчени көргүзерин саналдап турар. «Бо чүүл болгу дег таарымча чок чүүлдерни эвээжедип, турум хандырылганы хандырар» - деп, Владислав Ховалыг онзалап демдеглээн.