Тывада полиция ажылдакчыларының профессионал мергежилинге мөөрейни тургускан. Мергежил талазы-биле тергииннерни Үш аңгы номинацияга тодарадыр – полиция участогунуң, патруль-пост болгаш таңныыл-хайгаарал албанында полиция ажылдакчыларының аразындан мергежилиниң тергииннерин илередир. Республиканың чазаа ындыг мөөрейни эрттирер болгаш акшаландырар дугайында шиитпирни хүлээп алган. Ол ышкаш тиилекчилерни илередир негелделериниң дугайында дүрүмнү бадылаан.Документиниң эгелекчизи ТР-ның ИХЯ-зының дыңнатканы-биле алырга, мөөрей полиция ажылдакчыларының профессионал белеткелиниң деңнелин бедидеринче, айыылдыг байдалдарда даалгаларны шиитпирлээр билиг-мергежилин болгаш арга-дуржулгазын сайзырадырынче болгаш бедидеринче угланган. Ол бедик мергежилдиг ажылдакчыларны тодарадып, деткииринге, ИХЯ органнарының удуртулгазынга составында кадрлар курлавырын хевирлээринге дузалаар.
Албан-дужаалынга 1 чылдан эвээш эвес үеде ажылдаан, эки үнелелдиг болгаш чурум үрээн дээш хемчег албаан ажылдакчылар мөөрейге киржир. Ону чылдың-на эрттирер: майда – таңныыл-хайгаарал албанының болгаш түр када хоругдал черлериниң ажылдакчыларынга, июньда – участок шагдааларынга, июльда – патруль-пост албанынгының ажылдакчыларынга. 2025 чылда бир дугаар мөөрейни эрттирген.
Мөөрейниң негелдези езугаар киржикчи бүрүзү албан-хүлээлге, эрге-хоойлу, от ажыдарынга, күш-шыдал болгаш эмчи белеткелинге айтырыг-харыыны эртер. Чижээ, от ажыдарынга чепсекти адырып-чыырынга, караже дүрген адарынга, дайынчы хүреш аргаларынга, тырттынарынга болгаш кросска күш-дамыр белеткелин көөр.
Ажыл-чорудулганың аайы-биле номинация бүрүзүнге тиилекчилерни болгаш шаңналдыг черлер үндүрер – участок шагдаалары, ППС база таңныыл-хайгаарал албаннарының ажылдакчыларының ажылының угланыышкыннары-биле номинация бүрүзүнге шылгараңгай ажылдакчыларны илередир. Тиилекчилерге акша шаңналдарын тыпсыр.
Тываның эрге-чагыргазы мөөрейниң дузазы-биле шагдаалар одуруунга хүлээлгезин эрттирер күүседир күзелдиг аныяктарны сонуургадып, хаара тударын идегеп турар. Бо хүнде эрге-хоойлу камгалаар органнарда кадрлар чедишпейн турар. Республиканың участок шагдааларынче 27 олут хостуг. Ол хире санныг суурлар кем-херек үүлгедиишкининиң салдарынга таваржып болур айыылы улуг.