«Россети Сибирь Тываэнерго» компаниязы Кызылга чырык хандырылгазын катап тургускан. Дүүн республиканың найысылалынга суггур чаъстаан болгаш хадаанындан чырык хандырылгазында элээн каш өшкен черлерни чырыкта катап кошкан. Июнь 16-да Кызылдың чамдык девискээрлеринге чаъс үезинде чырык өшкен. Хоорайның чамдык черлеринге чырыктың камгалал болгаш техниктиг үрелиишкиннериниң соонда, ону түр када өжүрген.
Оперативтиг медээлер-биле алырга, электри шугумунда камгалал дериг-херексел ажылдап эгелээнинден Бай-Хаакская кудумчузунда чырык 11 шак хыппаан, чүгле июнь 17-ниң эртенинде ону катап берген. Хоорайның төп кудумчуларында, ооң иштинде Ленин, Кочетов, Дружба, Красноармейская, Рабочая, Рихард Зорге, Чургуй-оол, Каа-Хем, Мугур, Интернациональная, Комсомольская, Тыва эки турачылар, Чульдум кудумчулар участоктарынга чырык 12 шак 34 минута хире үеде өшкен. Септелге ажылдарын доозупкаш-ла, электри хандырылгазын берген. 12 хире шак чырык чок турган Кузнецов биле Крылов кудумчуларының чурттакчыларын чырык-биле хандырган.
Кызыл хоорайның болгаш Кызыл кожууннуң Шамбалыг база Кур-Чер болгаш Каа-Хем кожууннарның Бүрен-Хем, Кундустуг, Суг-Бажы суурлар дөрт шак хире чырык чок турган. Ам чурттакчылыг черлерде электри хандырылгазы катап тургустунган.
Кызылдың төп болгаш чөөн талазында байдал нарын. Июнь 16-ның кежээзинде ында Ф.10-05 дугаарлыг шугумда чырык өшкен, июнь 17-ниң эртенинде-даа ол хыппаан. Техниктиг ажылдарны чорудуп, аварийлиг катап тургузуушкун ажылдары чоруп турарындан, ону түр када өжүрген.
«Россети Сибирь Тываэнерго» специалистери онза байдал тургустунган соонда-ла, ооң уржуктарын чайладып эгелээш, кежээге чедир ону дооскан. Дүне база бо эртен катап тургузуушкун ажылдары уламчылаан. Аңаа 28 кижиден тургустунган 9 бригаданы база 9 техниканы хаара туткан.