Тыва Республикадан абитуриентилерге Россия Федерациязының Камгалал яамызының дээди шериг өөредилге черлеринче дужаап киреринге ийи чүс ажыг олуттарны тускайлаан. Ат-сураглыг шериг академияларынга болгаш институттарынга өөренири-биле шилиттинген кордакчылар дужаап болур.
Шериг дээди өөредилге черлеринче доктааттынган чурум болгаш хуусаа езугаар дужаап кирер. Бо чылдың июнь 1-ниң байдалы-биле алырга, Тыва Республиканың муниципалдыг тургузугларының шериг комиссариаттарынче Россияның дээди шериг өөредилге черлеринче дужаарын планнап турар абитуриентилерден 118 билдириишкин кирген. 56 кижиниң хууда херээн белеткээн: оларның 35-и – Кызылдың школачылары, а 5 кижи – Кызыл кожуундан өөреникчилер, Улуг-Хем кожуундан 4, а артканнары – Тожу, Барыын-Хемчик, Чөөн-Хемчик кожууннардан доозукчулар.
Июнь 16-дан 20-ге чедир Кызыл хоорайга, Новосибирскиниң дээди шериг командылал училищезиниң үнүүшкүннүг хүлээп алыышкын комиссиязы Камгалал яамызының шупту дээди өөредилге черлериниң сонуургалдарынга дүүштүр кандидаттарны шилип ажылдаар. Дээди өөредилге черлериниң бодунга барып дужаар кижилерден аңгыда, шупту абитуриентилер баш бурунгаар шылгалдаларны Кызылга дужаап ап болур.
Кызылдың Президентиниң кадет училищезиниң кадеттери, ол ышкаш Шериг-медицина академиязы (Санкт-Петербург), Шериг университеди (Москва), Армияның генералы С.М.Штеменко аттыг Краснодарның дээди шериг училищези, Россия Федерациязының Национал гвардиязының федералдыг шериг албан чериниң шериг институттары, А.Ф. Можайский аттыг шериг-космос академиязы, А.К.Серов аттыг Краснодарның ужудукчуларның дээди авиация училищези, далай болгаш ужудукчу угланыышкынныг дээди өөредилге черлеринче өөренир күзелдиглер хоорайларынга барып дужаар.
Абитуриентилер кандидаттарга дужаап кирериниң, өөренириниң байдалдарының база негелделериниң дугайында тодаргай информацияны алырда, дараазында албан езузунуң дөстеринден билип ап болур:
1. Россия Федерациязының Камгалал яамызының албан езузунуң сайтызы;
2. Тыва Республиканың шериг комиссариадының албан езузунуң сайтызы.
Бир эвес айтырыглар тургустунуп келзе, азы немелде консультация херек апарза, шериг учедунда тургустунган чериниң шериг комиссариадындан айтырып болур:
- Тыва Республиканың шериг комиссариадының шериг албанынга хамаатылар белеткээр килдизи (Кызыл хоорай): телефон 8 (394-22) 2-73-98;
- Кызыл хоорайның шериг комиссариады: телефон 8 (394-22) 2-74-12.