
Регионда улуг өрт айыылы улуг болганындан, Тывада өртке удур тускай чурумну июнь 16-га чедир узаткан. Тываның Гидромет төвүнүң дыңнатканы-биле алырга, республиканың төп болгаш мурнуу кезээнде, Улуг-Хем биле Эрзин кожууннарда өрт айыылының 4-кү бедик чадазы хевээр. Оон аңгыда, агаарөбойдустуң таарымча чок байдалдарын баш бурунгаар көрүп турар, бойдус өрттериниң тыптып келиринге салдарлыг «кургаг» чаңныктар дүжүп болурун дыңнадып турар.
Тываның Арга-арыг яамызының арга-арыгда федералдыг, күрүне, арга-арыг болгаш өрт хайгааралының, арга-арыг камгалаар болгаш кадарар эргелелиниң оперативтиг медээзи-биле алырга, июнь 11-ниң хүнү-биле алырга, республиканың арга-арыг фондузунда хып турар өрттер чок. Сөөлгү хүннерде регионга чаъстыг агаар-бойдус оожум байдалды хандырган. Ындыг-даа болза, Арга-арыг яамызының курлавырында 244 кижи болгаш 129 санныг техника белен чорукта.
Ведомство өртке удур онза чурум үезинде сагыыр ужурлуг дүрүмнерни база ктап сагындырган.
Чер участоктарынга болгаш хову-шөлдерге боктар, кургаг үнүштер өрттедири, от кыпсыры, ажык отка аъш-чем кылыры хоруглуг. Оон аңгыда, хамаатылар арга-арыгларже кирер дизе, тускай чөпшээрелдерни алыр ужурлуг, оларны арга-арыг яамызындан азы арга-арыг черлеринден ап, кирер хамаатыларның болгаш техниканың дугайныда медээни албан бүрүткедир.
Чурум үрээшкиннеринге улуг торгаалдар көрдүнген: хамаатыларга 10-дан 20 муң рубль чедир, албан-дужаалдыг кижилерге – 30-ден 60 муң рубль чедир, юридиктиг черлерге – 400-тен 800 муң рубль чедир.
Өрт айыылының чуруму эгелээнден бээр күрүнениң арга-арыг инспекторлары арга-арыг фондузунуң черлеринге 1056 рейдини чоруткан. Ооң түңнелинде, Россия Федерациязының административтиг кем-херек үүлгедиишкиннериниң дугайында хоойлунуң 8.32 чүүлү 1-ги чүүлү езугаар18 административтиг херекти долдурган.
2025 чылдың өрт сезону эгелээнден бээр Тывада 53 арга-арыг өрттери бүрүткеттинген.
Арга-арыг өрттериниң дугайында дыңнадыгларны 01, 101 база 112 дугаарлыг кыска дугаарларже дыңнадып болур.