Июнь 11-де Кемерово хоорайда эгелээн Сибирь чоннарының бирги чайгы Спартакиадазында тускай шериг операциязының киржикчилери-биле кады 50 ажыг спортчулар Тываны төлээлеп турар. «Кузбасс-Арена» спорт комплекизинде болуп турар маргылдааларда Сибирь федералдыг округтуң 10 субъектизинден спортчулар, тренерлер, команда төлээлери дээш ниитизи-биле 543 кижи ында киржип турар.
Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев спартакиаданы ажыткан. «Кады күжениишкиннер-биле ол мөөрейлерни Сибирьде болгаш бүгү чуртта эң-не солун болгаш онзагай болуушкуннарның бирээзи болдуруптаывыска бүзүрээр мен» - деп, бүрүн эргелиг төлээ чугаалаан.
Республиканың Баштыңы Владислав Ховалыг бодунуң блогунда Спартакиаданың киржикчилерин Тываның өмүнээзинден байырны чедирген. Регионнар аразының «Сибирь дугуржулгазы» ассоциациязының лидерлериниң бирээзи болганда, Сибирьде эң-не улуг апарган маргылдааларны организастаарынга болгаш эрттиреринге МАСС-тиң онзагай ролюн демдеглеп, спортчуларга төлептиг болгаш шынчы демиселди, ол ышкаш чайыннчалчак тиилелгелерни болгаш бедик чедиишкиннерни күзээн.
“Кузбасс-Арена” болгаш “Кузбасс” доштуг ордунуң шөлдеринге июнь 11-ден 15-ке чедир болуп эртер спартакиада үезинде хостуг хүрешке, самбога, аар атлетикага, стол теннизинге, волейболга, эштиринге, кара адарынга болгаш курлуг корэш хүрежиринге маргылдаалар болуп эртер. Оон аңгыда программада пауэрлифитинг болгаш олупу алгаш хол бөмбүүнүң мөөрейлерин киирген.
Сибирь чоннарының спартакиадазы - 2035 чылга чедир Сибирь федералдыг округтуң хөгжүлде стратегиязын боттандырар планның бир хемчээ болуп турар. 2025 чылда мөөрейлерни Кузбасстың Чазак Администрациязының база мөөрейлерниң координатору - Россия Федерациязының субъектилериниң “Сибирь дугуржулгазы” регионнар аразының экономиктиг кады ажылдажылга ассоциациязының дузазы-биле ол эрттирип турар.