Тыва Республиканың Баштыңы Владислав Ховалыг аңгы-аңгы мергежилдерниң төлээлеринге күрүне шаңналдарын тывыскан. Күрүне шаңналдарын тыпсырының мурнунда Тываның Баштыңы Владислав Ховалыг российжи күрүнениң чарылбас кезии Тывада чурттап, ажылдап турар чоннарның эп-демин күрүне байырлалы Россия хүнү улам быжыглап турар деп, чугаалаан. Россияның болгаш Тываның күрүне шаңналдарынга төлептиг болганнар бистиң чуртувустуң күчү-күжүн быжыглаарынга, хөгжүлдезинге боттарының улуг үлүг-хуузун кииргеннер деп республиканың удуртукчузу демдеглээн.
"Тыва Республика – аңгы-аңгы чоннарның төлээлери чурттап турар российжи улуг күрүнезиниң чарылбас кезээ, ынчалза-даа ниити чурту – Россияга ынакшылы оларны каттыштырган. Сөөлгү чылдарда кадык камгалал, өөредилге, спорт, культура талазы-биле президентиниң национал төлевилелдерин боттандырарынга эки түңнелдерни чедип алган бис. Экономиктиг өзүлдени, чуртталга тудуунда чедиишкиннерни демдеглеп турар бис. Ол бүгү среспубликаның шупту чурттакчыларының, силерниң ажылыңар-биле чедип алдынган” – деп Владислав Ховалыг чугаалаан.
Республиканың чурттакчылары демнешкеш, экономиктиг чаагай чорукту быжыглап, чаңгыс чер-чурттугларының чаагай чоруун бедидип, Тиилелгеге төлептиг үлүг-хуузун киирип шыдаар бис дээрзинге бүзүрелин илереткен.
Чаңчыл ёзугаар, Россия хүнүнде, чурттуң хөгжүлдезинге ак сеткилдиг күш-ажылы-биле үлүг-хуузун киирип чоруур аңгы-аңгы мергежилдерниң төлээлерин: башкыларны, эмчилерни, культура болгаш спорт ажылдакчыларын, улусчу ус-шеверлерни болгаш эртемденнерни, шериг албанныгларны шаңнап-мактаан.
Россия Федерациязының Президентизиниң айтыышкыны-биле ниитилел ужур-дузалыг хемчеглерни белеткээни болгаш эрттиргени дээш Кызыл хоорайның Совет Эвилелиниң Маадыры Михаил Бухтуев аттыг 1 дугаар школаның директору Шарыпова Татьяна Леонидовнага Россияның Проезидентизиниң Өөрүп четтириишкинин бижиин тывыскан.
Татьяна Леонидовна алырга, эп-сеткилдиң болгаш чаңгыс демниг чоруктуң демдээ болур байырлал-биле байырлыг езулалдың киржикчилеринге байырын чедирген:
- Менээ дыка байырланчыг боорда, сүрээденчиг-дир. Күрүне Баштыңының шаңналын республика Баштыңының холундан бөгүн алыры улуг хүндүткел. Башкының мергежили чурттуң келир үезинге, ооң сайзыралынга тураскааттынгы улуг ужур-уткалыг. Кижи бүрүзүнге бедик профессионал чедиишкиннерни күзедим! Бистиң күжениишкиннеривис Тываның болгаш Россияның хөгжүлдезинге төлептиг үлүг-хуузун киирер болзун! - деп, ол чугаалаан.
Шериг албан-хүлээлгезин ак сеткилдиг күүсеткени болгаш бедик профессионал мергежилдии дээш, Тыва Республиканың Баштыңының Өөрүп четтириишкин бижиин Кызыл хоорайның шериг комиссариадының хамаатыларны шериг албанынче кыйгыртыр салбырның начальнигиниң улуг оралакчызы Хорошавина Юлия Викторовнага тудускан.
Шериг албан-хүлээлгезин күүседип тура көргүскен эрес-дидим чоруу дээш, Росгвардияның Тыва Республика талазы-биле эргелелиниң тускай сорулгалыг “Адыг” отрядтың командириниң оралакчызы — политиктиг ажыл талазы-биле салбырның начальниги, полицияның майору Николаичев Алексей Александровичиге “Тускай шериг опреациязының киржикчизи” тураскаал медальды Тыва Республиканың Баштыңының Чарлыы-биле тывыскан.
Шериг албан-хүлээлгезин ак сеткилдиг күүсеткени болгаш бедик профессионал мергежилдии дээш, Росгвардияның Тыва Республика талазы-биле эргелелиниң штавының дежурный албанының оперативтиг дежурныйының дузалакчызы Курочкин Александр Игоревичини “Тиилелге хүнү” тураскаал медаль-биле шаңнаан.
Кадык камгалалының хөгжүлдезинге киирген үлүг-хуузу база хөй чылдарда ак сеткилдиг ажылы дээш "Тыва Республиканың алдарлыг эмчизи" хүндүлүг атты Бай-Тайга кожууннуң төп эмнелгезиниң кол эмчизи Мөге-Хүрен Марианна Шириин-ооловна тывыскан.
Өөредилге адырынга киирген улуг үлүг-хуузу болгаш хөй чылдарда ак сеткилдиг ажылы дээш "Тыва Республиканың өөредилгезиниң алдарлыг ажылдакчызы" хүндүлүг атты Тываның республика лицей-интернадының күш-культура башкызы Монгуш Алефтина Чанагаш-ооловнага тывыскан.
Үре-түңнелдиг ажылы болгаш өзүп орар салгалды күш-культурага кижизидеринге чедиишкиннери дээш "Тыва Республиканың алдарлыг тренери" хүндүлүг атты Мөңгүн-Тайга кожууннуң бичии уругларның спорт школазының башкызы, кикбоксг тренери Иргит Аян Ильичиге тывыскан.
Эртем-педагогика ажыл-чорудулгазынга ачы-хавыяазы болгаш хөй чылдарда ак сеткилдиг ажылы дээш "Тыва Республиканың эртеминиң алдарлыг ажылдакчызы" хүндүлүг атты Тываның күрүне университединиң филология факультединиң деканы, филология эртемнериниң кандидады, доцент Сувандии Надежда Дарыевнага тывыскан.
Кадык камгалалының хөгжүлдезинге киирген үлүг-хуузу база хөй чылдарда ак сеткилдиг ажылы дээш " Тыва Республиканың алдарлыг эмчизи" хүндүлүг атты «Медстар» ХБК-ның травматолог-ортопед эмчизи Седип Нелла Александровнага тывыскан.
Библиотека ажыл-херээн хөгжүдеринге ачы-хавыяазы, үр үе дургузунда ак сеткилдиг ажылы дээш " Тыва Республиканың культуразының алдарлыг ажылдакчызы" хүндүлүг атты культураның хоочуну Селигеева Вера Егоровнага тывыскан.
Өөредилге адырында ачы-хавыяазы болгаш үр үе дургузунда ак сеткилдиг ажылы дээш, " Тыва Республиканың өөредилгезиниң алдарлыг ажылдакчызы" хүндүлүг атты Тес-Хем кожууннуң Кызыл-Чыраа ортумак ниити билиг школазының эге класстар башкызы Эрендей Хангал Идамовнага тывыскан.
Хөй чылдарда ак сеткилдиг күш-ажылы дээш "Тыва Республиканың алдарлыг ажылдакчызы" хүндүлүг атты Бай-Тайга кожууннуң Тээли суурнуң Виктор Иргит аттыг «Авырал» немелде өөредилге төвүнүң башкызы Уртунай Сайлык Мөгеевнага тывыскан.
Культураның болгаш уран чүүлдүң хөгжүлдезинге киирген үлүг-хуузу, хөй чылдарда ак сеткилдиг ажылы дээш " Тыва Республиканың улустуң мастери" хүндүлүг атты Россияның чурукчулар эвилелиниң болгаш Тыва Республиканың чурукчулар эвилелиниң кежигүнү Одушпай Сергей Кашпык-ооловичге тывыскан.
Хөй чылдарда ак сеткилдиг күш-ажылы дээш "Тыва Республиканың улустуң мастери" хүндүлүг атты национал тыва эт-сеп даараар мастер Ооржак Эльвира Апый-ооловнага тывыскан.
Күш-культура болгаш спорттуң хөгжүлдезинге улуг үлүг-хуузун кииргени, үр үе дургузунда ак сеткилдиг ажылы дээш «ЦСКА-Тыва» олимпийжи курлавырлар спорт школазының директору Биче-оол Буян Владимировичини Тыва Республиканың “Шылгараңгай күш-ажылы дээш” медаль-биле шаңнаан
Күрүнениң бедик шаңналдарынга төлептиг болганнар Тываның Баштыңы Владислав Ховалыг-биле кады тураскаал чурукка тырттырып алганнар.