Тываның Баштыңының тергиин башкыларга тывыскан шаңналы – башкылар коллективин деткиир чугула хемчеглерниң бирээзи. 2006 чылда эгелээн бо мөөрейниң шилилгезинге 700 ажыг кижи киришкен, оларның 180-зи күрүне деткимчезин алган. Мөөрей тиилекчилериниң аттарын чаңчыл езугаар күзүн, башкыларның профессионал байырлалы – Башкы хүнүнде чарлаар. Амгы үеде 31 башкы мөөрейниң аңгы-аңгы чадаларын эрткен.
Өөредилге чорудуунга инновастыг өөредилге программаларын, амгы үениң технологияларын болгаш төлевилелдерин боттандырып турар тергиин башкыларга база инновация чурумунга ажылдап чоруур, өөредилгеге чаа арга-хевирни ажыглап чоруур эң-не тергиин класс удуртукчуларынга, бөлүктер кижизидикчилеринге, бөлүктер кураторларынга 2025 чылда Тываның Баштыңының шаңналдарын тыпсырының мөөрей шылгалдалары май төнчүзүнде доозулган.
Бо чылын Барыын-Хемчик, Чөөн-Хемчик, Өвүр, Сүт-Хөл, Тес-Хем, Улуг-Хем, Чаа-Хөл, Чеди-Хөл кожууннардан, Кызыл хоорайдан ниити өөредилге организацияларындан, Кызыл хоорайдан, Күрүне лицейинден база Тываның республиканың лицей-интернадындан башкылар мөөрейге киржири-биле билдириишкиннерни киирген. Мөөрейниң түңнелинде чүгле алды киржикчи шаңналды алыр.
Июнь 4-те мөөрейниң боду киржир чадазы башкының профессионал ниитилелге бодунуң методиктиг системазын боттандырганынга профессионал ажыл-чорудулгазының түңнелдерин хөй-ниитиге таныштырар хевирге эрткен.
Өөредилге организацияларының удуртукчулары, хөй-ниити болгаш профессионал каттыжыышкыннарның төлээлери кирген конкурс комиссиязы киржикчилерни үнелээр.
Комиссия кежигүннери мөөрей киржикчизи башкының профессионал тиилелгелерин, башкылар ниитилелиниң хүлээп көргени бодунуң методиктиг системазының бар-чогун, кичээлден дашкаар ажыл-чорудулгазының үре-түңнелдерин, өөреникчилериниң чедиишкиннерин, ажылында амгы өөредилге технологияларын ажыглаанын сайгарып көөр.
Чылдың-на мөөрейниң 10 тиилекчизин үндүрүп турар. Оларның алдызы – өөредилге организацияларында инновациялыг өөредилге программаларын, амгы үениң технологияларын болгаш төлевилелдерин идепкейлиг боттандырып турар башкылар коллективиниң башкылары болур. Чаа арга-биле ажылдап чоруур дөрт класс (бөлүк) удуртукчулары тиилекчилер санынче кирер.