Тыва Республикага культурлуг ужур-уткалыг болуушкун – «Ыдык ай» деп сарыг шажынның кол хүннеринге тураскаадып «Буддага муң өргүл» деп хөгжүм фестивалы болуп эртер. Бо айда чүдүкчүлер Будда Шакьямуниниң амыдыралында үш улуг болуушкунну: ооң төрүттүнгенин, Чырыткы четкенин болгаш Паринирвана четкенин байырлаар.
Июнь 11-де 10:00 шакта, байырлалдың төп болуушкуну болур Хороо чыскаалы «Цэчэнлинг» сарыг шажын хүрээзинден үнгеш, «Түбтен Шедруб Линг» хүрээзинге доостур. «Хороо» дээрге, буддийжи ёзу-чаңчылдардан ханы укталган, чүдүкчүлерниң сүлде-сүзүүнүң арыгланыышкынын болгаш чаңгыс демниг чоруун илередип турар ёзулалдыг чыскаал болур.
Тываның Камба-Лама эргелелиниң дыңнатканы-биле алырга, «Буддага муң өргүл» деп фестиваль киржикчилерге чүс-чүс чылдарның сарыг шажын билиглеринге катчып, кармазын арыглап, амыдырал-чуртталгазын чырык-биле долдурар онзагай арганы берип турар. Күжүгет Шойгу аттыг культура фондузунуң, Россияның буддистер ассамблеязының база Тыва Республиканың Культура яамызының киржилгези-биле организастаан бо хемчег буддийжи культураны, философияны болгаш шажын хөгжүмүн нептередиринге улуг идиглиг.
Бо чугула болуушкунга киржиринче республиканың чурттакчыларын болгаш аалчыларны кыйгырган. Фестиваль харылзааның болгаш бодалдар солчулгазының шөлү апарып, буддизмниң ужур-чаңчылдарын сагып, медереп билип алырынга дузалаар культуралар аразында кады ажылдажылганың көскү үлегери болур.