Тываның улустуң чогаалчызы, төөгү эртемнериниң доктору, «Хамнаашкынның дириг эртинези» деп ховар аттың эдилекчизи, тыва үндезин культураны болгаш хамнаашкынны шинчилээринге амыдыралын бараалгаткан Монгуш Кенин-Лопсанның төрүттүнгенинден бээр 100 чыл оюнга тураскааткан хам чүдүлгениң «Дүңгүр» IV-кү делегей чергелиг фестивалынга киржири-биле чагыгларны ам-даа хүлээп турар. Фестивальдың tuva-fest.ru деп сайтызында, оон аңгыда ол сайтыга долдурган майыкта билдириишкинни lilachur@mail.ru электроннуг адресче чорудуп болур.
Регионалдыг националдар херектериниң талазы-биле агентилел, Культура яамызы, Тываның «Дээди хамның албан чери» төпчүткен хамнаашкын организациязы фестивальдың тургузукчулары.
Вавилин ээтпээнден 13 км ыракта «Отдых S» турисчи баазага (Алдын-Хараал турисчи бааза турган чер) фестивальдың шупту хемчеглери бо чылдың июнь 27-ден 30-ге чедир болуп эртер.
Боттары машиналарлыг аалчылар навигаторда 51.803193, 94.481518 координаталарны ажыглап тургаш, ынаар чедип болурун организаторлар дыңнаткан. Оон аңгыда киржикчилерни Кызылдан фестиваль болур черже аргыштырарының аргаларын чугаалажып турар. Бо дугайында медээни фестивальдың албан езузунуң сайтызындан көрүп болур.
Россияның хамнар шуулганы-биле чылдың-на эртип турар «Дунгур» фестивалында М.Б. Кенин-Лопсанның амыдырал-чурталгазының дугайында «төгерик столду» база делгелгени бо удаада көрүп болур. Аалчылар хам чүдүлгениң шинчилекчилери болгаш этнографтарындан өөредиглиг лекцияларны болгаш беседаларны дыңнап, бурунгу чүдүлгениң төөгүзүн болгаш философиязын билип ап болур. Оон аңгыда хамнарга кирип, сонуургаан айтырыгларын салыр арга бар.
Фестивальдың аалчылары хамнаашкынның уттундурбас ёзулалдарын көрүп, бурунгу ужурларны билип, хей-аътты киискиткенин эскерип болур. Оон аңгыда хам чүдүлгезиниң мастер-класстарынга кижи бүрүзү киржир аргалыг. Баазаның девискээринге улусчу ус-шеверлерниң, хамнаашкын херекселдери болгаш камгалалдар делгелге-ярмарказы ажылдаар.
«Бо ийи хүн дургузунда тыва культураның агымынче шымнып, тус черниң хөгжүм күүседикчилерин, хамнарның хөөмейин дыңнап болур» - деп, организакчылар демдеглээн.
Россияның болгаш Тываның дээди хамы, регионнуң хамнаашкын ёзулалдарының кол эдилекчизи Кара-оол Допчун-оол фестивальга киржир. Кыдаттан, Перудан, Турциядан, Казахстандан, Германиядан, Моолдан киржикчилер Тывага келири билдинген.
Бо хүнде Тывада он хире хам организациялары албан езузу-биле ажылдап турар, оларның аразында Кызылдың «Адыг-Ээрен», «Бөрү-Ээрен», «Тос-Дээр» шажын организациялары эң билдингир.