Тываның Баштыңы Владислав Ховалыг химия шылгалдазынга эң бедик баллдарны алган 11-ги класстың доозукчуларының дугайында дыңнаткан. Кызылдың 9 дугаар гимназиязының өөреникчизи Ай-Шуру Белек-оол, Таңды кожууннуң Сосновка ортумак школазының доозукчузу Адыгжы Оюн биле Кызылдың 5 дугаар гимназиязындан Тахир Ондар химияга чаңгыс аай күрүне шылгалдазын 100 баллга дужааган. Республиканың Баштыңы уругларга болгаш оларның башкылары - Джемма Сергеевна Бычкова, Елена Диин-ооловна Ондар, Мариета Малчыновна Салчакка тергиин түңнелдерлиг болганы-биле байыр чедирген.
«Ниитизи-биле 608 кижи химия шылгалдазын дужааган. Кызылдың президентиниң кадет училищезиниң болгаш Тываның күрүне лицейиниң доозукчулары база 99 баллдың бедик түңнелдерин көргүскен» - деп, Баштың дыңнаткан.
Владислав Ховалыг чаңгыс аай күрүне шылгалдазының үези – доозукчуларның ада-иезинге болгаш чоок эш-өөрүнге база кончуг харыысалгалыг үе болур, ооң түңнелдеринден өөредилге черин шилиири база уругларның улуг чуртталгаже оруу хамааржыр деп чугаалаан.
Июнь 6-ның хүнү-биле алырга, 11 класстың доозукчулары «Төөгү», «Литература», «Химия», «Ниитилел эртемнери», «Биология», «География», «Даштыкы дылдар» (бижимел кезээ) болгаш албан дужаар эртемнер: орус дыл, тускай болгаш ниити деңнелдиң математиказынга шылгалдаларны эрткен.
Чамдык уруглар июнь 10 биле 11-де «Информатика», «Даштыкы дылдар» (аас-биле) деп эртемнерге чаңгыс аай күрүне шылгалдазын дужаар.
А июньнуң 16-да чаңгыс аай күрүне шылгалдазын дужаарының курлавыр хүннери эгелээр.
Дүүн Тыва Республиканың Чазааның Даргазының оралакчызы Орлан Сарыглар Кызыл хоорайда чаңгыс аай күрүне шылгалдалары дужаар пунктуларының бирээзин хынап, 11-ги класстың доозукчуларының күрүнениң түңнел шылгалдаларын дужаап турарын организастаанын көрген. Регионнуң школаларында шылгалда дужаар 28 пунктуларны, 28 бажыңны, кеземче херээ эрттирер база түр хоругдал черлеринде 3, эмнелге организациязында 1 пунктуну белеткээн.
Тываның Өөредилге яамызының дыңнатканы-биле алырга, бо чылын 2,5 муң ажыг доозукчу чаңгыс аай күрүне шылгалдазын дужааган. Ниитилел эртемнери, тускай математика, биология, химия болгаш төөгү эртемнерин шилээн уругларның саны бо чылын база хөй.
Эрткен чылын Президент Владимир Путинниң эгелээшкини-биле киирген «президент» хүннеринде – июльдуң 3 биле 4-те эртемнерниң кайы бирээзин катап дужаар арга уругларда бар.