Тываның Баштыңынга регионнуң Арбитраж судунуң чаа даргазы Аяс Таргынны албан езузу-биле таныштырган. Ооң федералдыг коллегалары - Чөөн-Сибирь округунуң Арбитраж судунуң даргазының оралакчызы Вячеслав Загвоздин база III-кү апелляциялыг Арбитраж судунуң даргазы Андрей Зуев чаңчыл болу берген бо езулалды эрттирери-биле республиканың найысылалынга келгеннер.
Чазак бажыңынга Владислав Ховалыгның судьялар-биле ажылчын ужуражылгазы болган. Регионнуң арбитраж судтарының даргаларын ол албан-дужаалче РФ-тиң Дээди Судунуң Даргазының сүмелээни-биле база Судьяларның дээди квалификациялыг коллегиязының чогумчалыг түңнели-биле РФ-тиң Президентизи томуйлап турарын сагындыраал. Аяс Таргын 2025 чылдың май 15-те № 315 чарлыы-биле томуйлаттынган. Хоорай судьязының дузалакчызындан Тываның Дээди Судунуң даргазының оралакчызынга чедир орукту эрткен, суд системазының эң-не дуржулгалыг төлээлериниң бирээзи деп коллегалары демдеглээн.
Владислав Ховалыг Аяс Таргынга чаа албан-дужаалче киргени-биле байырны чедиргеш, ол биче болгаш ортумак сайгарлыкчы чоруктуң көвүдээни-биле дүгжүп турарын демдеглээн. Сөөлгү 6 чылда биче болгаш ортумак сайгарлыкчы чорук субъектилериниң саны 3,6 муңга өскен болгаш, 2025 чылдың май 10-га чедир 10,4 муң ажа берген. Олар 40,5 муң ажыг чурттакчыларны ажыл-биле хандырып турар.
"Ынчангаш экономиктиг маргылдааларны болгаш оларны шиитпирлээриниң айтырыы чугула апарган. Коллегаларымга чөпшээрежип тур мен: экономиктиг субъектилер аразында чүгле чаргы-чаалызының санын кызырары эвес, а оларның маргыштыг чүүлдерин эвээжедип, харылзааны экижидери чугула. Ол бистиң ниити ажылывыс болур» - деп, Тываның Баштыңы чаа албан-дужаалда томуйлаткан Аяс Таргынга чагып, чедиишкиннерни күзээн.