Бөгүн, июнь 5-те, Тываның найысылалынга Россияның чоннарының хөгжүм херекселдериниң «Көшкүн чоннуң каптагайы» регионнар аразының фестивалы эгелээр. Бо хөгжүм фестивалы ышкаш культура болуушкунунга дөмей хемчег бистиң регионнуң төөгүзүнде болуп көрбээн. Тыва национал оркестрниң фестивальды эрттирер эгелээшкинин Тыва Республиканың Чазаа деткээн болза, Россия Федерациязының Культура яамызының грант акшазы-биле ону боттандырар. Регионнуң Баштыңы Владислав Ховалыг апрельдиң эгезинде, социал четкилерде бодунуң арынынга, удавас эртер хемчегниң дугайында дыңнатканын сагындыраал. Чурттуң чаңгыс демниин быжыглаарынга болгаш улусчу ужур-чаңчылдарны кадагалап арттырынга үш хүнде болуп эртер хемчег улуг ужур-дузалыг болур деп, ол демдеглээн.
Россияның чоннарының хөгжүм өнчү-салгалы-биле Тываның чурттакчыларын болгаш аалчыларын таныштырары, республиканың национал уран чүүлүн кадагалап, сайзырадыры, аныяк-өскенниң национал хөгжүм херекселдеринге сонуургалын оттурары – фестивальдың сорулгазы.
Бөгүн 18:00 шакта, «Хүреш» стадионунга, фестивальдың байырлыг ажыдыышкынынга регионнуң Баштыңы Владислав Ховалыг киржир. «ВКонтакте» социал четкиде «Тыва 24» телеканал ук хемчегниң дорт дамчыдылгазын организастаар.
Көрүкчүлер бурунгу тоолчургу чугааларның болгаш уттундуруп бар чыдар ужур-чаңчылдарның делегейинче шымнып, театржыткан көргүзүг-биле ажыттынар кайгамчык шоуну көөрлер. Кежээки концертке Тыва Республиканың Национал оркестри он хөгжүмнүг чогаалдарны бараалгадыр. Республиканың булуңнарындан келген 85 элээди оолдар, кыстардан тургустунган тыва национал хөгжүм херекселдериниң каттышкан оркестри сцена кырынга бир дугаар бараалгаар. «Тывам чери», «Каптагай», «Коңгургой», «Чавыдак», «Доруг-Дайым», «Эне-Сай», «Ыдык арттым, өршээ!», «Күлтегин» деп чогаалдарны ойнаар. Им Фо Пэн (Кыдат), Аңчы Тамдын болгаш Эртине Тумат оркестрни дирижерлаар.
Программаның ийиги кезээнде, фестивальдың киржикчилери болгаш аалчыларының күүселдези-биле этнодискотеканы планнаан. Москваның күрүнениң академиктиг филармониязының солизи Катерина Анохина, цимбалага тулган ойнаар алдарлыг мастер Антон Прищепа-биле (кларнет) биле Башкирияның Х. Ахметов аттыг күрүне филармониязының солизи Артур Гайсаровтуң (курай, кубыз, думбыра национал хөгжүм херекселдери) дуэтке ойнаарын база фестивальдың өске-даа аалчыларының оюн-көргүзүүн көрүп болур. Калмыкияның национал оркестри (уран чүүл удуртукчузу Савр Катаев) элээн каш номерлерни бараалгадыр.
Фестивальче каш хонук бурунгаар чедип келген чамдык киржикчилер тыва артистер база келир үениң хөгжүмчүлери-биле профессионал арга-дуржулгазын үлешкен. Р.Д. Кенденбиль аттыг республиканың уран чүүл школазынга Катерина Анохина биле Бурятияның национал оркестриниң хөгжүмчүзү, композитору, дирижеру Жаргал Токтонов мастер-класстарны эрттиргеннер.
Алтайдан, Башкириядан, Бурятиядан, Калмыкиядан, Татарстандан, Хакасиядан, Якутиядан, Кемерово облазындан, Красноярсктан база Москвадан ниитизи-биле 150 хире ат-сураглыг хөгжүмчүлер Тывага эртер фестивальда киржип чедип келгеннер.
Фестивальдың үш хонуунда Кызылга үш улуг концерт болур. Эртен июнь 6-да, В. Көк-оол аттыг Национал хөгжүм-шии театрынга 19:00 шакта, Россияның аңгы-аңгы булуңнарындан бүгү аалчыларның киржилгези-биле «Көшкүн амыдыралдың аялгалары» деп концерт болур.
Хөгжүм-шии театрынга, июнь 7-де 18:00 шакта, түңнел гала-концертти планнаан. Июнь 6-да 10:00 шакта ТР-ниң Культура яамызынга «төгерик столга» эксперттер чыглып келгеш, Россияның чоннарының хылдыг хөгжүм уран чүүлүнүң хөгжүлдезиниң келир үезин сайгарып чугаалажыр.