Тускай шериг операциязында киржип турар шериг албанныгларга база хостаттырган девискээрлерде тайбың чурттакчыларны деткиир гуманитарлыг ачы-дузаны чыыр чайгы кампания Тывада эгелээн. Ол «Бүгү чүвени Тиилелге дээш!» федералдыг төлевилел-биле чоруп турар дузаламчы чыыр акцияны Тыва Республиканың Чазаа болгаш Бүгү-россияның Улусчу фронтузунуң регионалдыг салбыры удуртуп турар.
Тывада УФС-тиң удуртукчузу Саима Далчинның тайылбырлааны болза, тыва шериглерниң албан эрттирип турар кезектериниң командирлер чөвүлелиниң чагыы езугаар, бо чоокку үеде техниктиг болгаш транспорт аймаан чыыр. Бир дугаарында, квадрокоптерлер, квадрокоптер детекторлары, харылзаа дериг-херекселдери, РЭБ, генераторлар, эмнер, мотоциклдер, чаштынар четкилери-дир. Оон аңгыда шефте алганы Луганск Улус Республиканың Свердловск муниципалдыг округтуң тайбың чурттакчыларынга үр үеде шыгжаар аъш-чем аймаан, гигиена продукциязын болгаш канцелярия херекселдерин чыып турар.
Тываның чурттакчылары болгаш организациялары гуманитарлыг чүък чыылдазында идепкейлиг киржип турар. Бо хүнге чедир республиканың волонтер организациялары 20 чаштынар четкилерни, Россияның ФККА-ның Тыва Республикада эргелелиниң ажылдакчылары мотоциклди, генераторну, харылзаа дериг-херекселдерин чыылда пунктузунда дамчыткан. Кадык камгалал албан черлери 55 дугаар бригаданың эмчи кезээнге 515 хааржак хууда камгалал херекселдерин болгаш эмнерни чоруткан.
Ресфармация күрүне албан чери ХДД-ни 522 дугаарлыг шериг кезээнче адрестиг чорудуп турар.
- Бистиң камгалакчыларывыска бо ачы-дузалар кайы хире херек дээрзин билир бис. Мурнуку одуругда улуска моон-даа соңгаар дузалажыр бис – деп, Ресфармацияның директору Чойгана Докпер-оол чугаалаан.
Акцияга тус черниң волонтер каттыжыышкыннары-биле чергелештир, Красноярск крайдан «Демнигде күштүг» ниитилелдиң төлээлери киржип турар. Олар шериглерге чаштынар четкилерни дамчыткан. «Чаңгыс чер-чурттугларывыс бистиң дайынчыларывыска канчаар дузалажып турарын кыдыындан көрүп, хажыызынга артып шыдавас» - деп каттыжыышкынның үндезилекчизи Алексей Монгуш чугаалаан.
Фронтуже гуманитарлыг чүък чыылдазынга кижи бүрүзү үлүг-хуузун киирип болур: ынчангаш ажылчын коллективтерни, хууда сайгарлыкчыларны, хөй-ниити организацияларын болгаш чурттакчы чонну чалап турар. Оон аңгыда фронтуже машиналар бээр күзелдиг хамаатылар азы организациялар Улусчу фронтунуң офизинге харылзажыр аргаларын артырып болур, а оларның машиналары ТШО зоназынче ниити чыскаал-биле чоруур. Бир эвес машиналарга септелге херек болза, Улусчу фронт салбырынче база долгап болур силер: ол транспортту септээш, чорударын организастаар.
Гуманитарлыг ачы-дуза чыылдазы август 8-ке чедир уламчылаар.
Гуманитарлыг дузаламчы чыыр пункт дараазында адресте Улусчу фронтунуң күүсекчи комитединде доктаамал ажылдап турар: Кызыл хоорай, Тыва эки турачылар кудумчузу, б. 3, 3 дугаар кабинет. Оон аңгыда Ленин кудумчузу 5 дугаар бажыңда Тываның күрүне университединде «Мы вместе» штабче база чедирип болур. Шупту айтырыгларны 8 (39422) 2-10-50, 2-11-50 дугаарлыг телефоннардан айтырып болур.