Тыва Республиканың Күрүнениң чуртталга инспекциязы болгаш тудуг хайгаарал албаны эрткен чылда ажыл-чорудулгазының отчедунуң бир кезээ кылдыр башкарыкчы компанияларның чылда рейтингизин таныштырган. Россияның Тудуг яамызының сүмелээни методика езугаар, Кызыл хоорайда ажылдап турар 16 башкарыкчы компанияларны үнелээн. Башкарыкчы компанияларның ажыл-чорудулгазының дугайында коммуналдыг ачы-дуза хереглекчилеринге дыңнадып, оларның ажылының шынарын бедидеринче идигни бээри-биле рейтингини чоруткан.
Инспекцияның тайылбырлааны болза, чурттакчыларның боттарының үнелелдеринге даянып, 2024 чылдың рейтингизин тургускан. Ылаңгыя хөй квартиралыг бажыңнар чурттакчылары үш кол негелде езугаар демдекти салган – башкарыкчы компанияның бодунуң ачы-дузазының дугайында медээни берип турары, хереглекчилерниң ол ачы-дузаның шынарынга үнелели база удуртулга айтырыгларынга хамаарыштыр чурттакчылар-биле чугаалажырынга компанияның ажык-чарлыы.
Чурттакчыларның болгаш бажың чөвүлелдериниң активчилериниң харыылааны түңнелдеринге даянып, хөй квартиралыг бажыңнар-биле эң эки ажылдыг 3 операторнуң санынче «Управдом Сервис», «ЖЭК» база «Лидер» компаниялар кирген. Олар шупту Кызылда ажылдап турар. «Управдом Сервис» албан чериниң хандырылгазында хөй каът 13, «ЖЭК»-те 2, «Лидер»-те - 6 бажыңнар бар.
Хожудаңнай үш компаниялар санынче "АРС" МУБ (45 бажың); "ГАС" КХН (33); «Ангарский» БК КХН (10) кирген.
Ооң-биле чергелештир «АРС» МУБ, «ГАС» КХН база «Ангарский» БК КХН республикада хөй квартиралыг бажыңнар хандырып, ажаап-тудар рынокта «эң улуг» компаниялар дээрзин тайылбырлаары артык эвес. Өске башкарыкчы компанияларга бодаарга, бо организацияларның чурттакчылары болгаш хереглекчилери хөй, ынчангаш хажыдыышкыннар дугайында медээлер көвей.
Тываның Чуртталга-коммунал ажыл-агый яамызы республика девискээринде хөй квартиралыг бажыңнарны башкарып турар организацияларның ажыл-чорудулгазынга хамаарыштыр үнелел бээриниң көргүзүглер даңзызын, рейтинг системазында дүрүмнү эде көөрүн албан черинге саналдаан.
Күрүнениң чуртталга инспекция албаны башкарыкчы компанияларга чоннуң талазындан рейтинг хөй квартиралыг бажыңнарны ажыглаар ачы-дузалар рыногунда чөптүг чижилгени тургузарынга болгаш чуртталга-коммунал ажыл-агыйының бүгү адырында ажылдың шынарын бедидеринге дузалаар ужурлуг деп санап турар. Рейтингиниң түңнелдеринге даянып, хөй квартиралыг бажыңнарның чурттакчылары, бир эвес оларның хөй кезии ооң ажыл-чорудулгазынга таарзынмайн турар болза, башкарыкчы компаниязын солуур дугайында шиитпирни хүлээп ап болур.