Тываның Арга-арыг болгаш бойдус ажыл-агый яамызы республиканың чурттакчыларын макулатура чыыр «БумБатл» деп улуг хемчээлдиг экологтуг эгелээшкинге идепкейлиг киржирин кыйгырган. Тыва Республика бүгү-российжи акцияда беш дугаар каттыжып турар. Бо чылдан эгелеп акция чаа хевирге эртип, бүдүн чыл дургузунда макулатураны хүлээп алыр. Төлевилелдиң чаа сезону март 25-те эгелээн, а 2026 чылдың мартда «БумБатл»-ды түңнээр.
«Бо акция чүгле бойдусту камгалаарынче үлүүн киирери эвес, а командазынга азы бодунга тергиин ат дээш демисежир арга-дыр» - деп, регионнуң Арга-арыг яамызы сагындырган.
«БумБатл»-га киржир дизе, бумбатл.рф деп сайтыга бүрүткедип алгаш, организациязын айтып азы боду киржирин бадыткап, интерактивтиг картадан хүлээп алыышкын пунктузун шилип алгаш, аңаа саазынны чедиргеш, хүлээткенин шынзыткан бижикти алгаш, хууда кабинединге киирер. Боттуң киришкен мөөрейиниң база өг-бүлениң саннарын чазын, чайын, күзүн болгаш кыжын чарлаар болза, командалыг база регионалдыг зачеттарның түңнелдерин 2026 чылдың март айда үндүрер. Тиилекчилерге үнелиг болгаш экологтуг белектерни тыпсыр.
Тывада макулатура чыыр болгаш хүлээп алыр талазы-биле партнёр «Вторпроект» КХН дараазында адресте турар: Кызыл хоорай, Энергетиктер кудумчузу, 4 дугаар бажың.
Тываның Арга-арыг яамызының дыңнатканы-биле алырга, бо хүнге чедир Кызылда болгаш республиканың кожууннарында 10 организация акцияже каттышкан. Тыва Республиканың Хамааты камгалал болгаш онза байдалдар талазы-биле өөредилге-методиктиг төп, Өвүр болгаш Таңды кожууннарның спортчу школалары, Таңды кожууннуң төп эмнелгези, Бай-Тайга кожууннуң Тээли суурда Тываның улусчу ус-шеверлер техникуму, Республиканың кещ аарыглары болгаш республиканың психиатрия эмнелгелери оларның аразында. Олар 360 кг макулатураны чыгган.
Эрткен чылын Тываның 20 организациязы акцияга идепкейлиг киржип, 9 тонна макулатураны чыып, дамчыткан. 2023 чылда 15 организация киришкен, оларның чыгган саазынының хемчээли 8 тонна болган.
Чурттуң Президентизиниң эгелээшкини-биле боттанып турар «Экологтуг чаагай чорук» национал төлевилелди деткиири-биле макулатура чыыр «БумБатл» бүгү-российжи акция кайда-даа калбарган. «Национал приоритеттер» АНО биле «Экосистема» шимчээшкини – төлевилелдиң организаторлары. Россияның Бойдус яамызы улуг деткимчени көргүзүп турар. «БумБатл» акция саазыннарны чыып, аңгылап тургаш, бойдус хүрээлелинче онза сагыш човаашкынны илередип турар. Акцияның 5 сезонунуң дургузунда 9 миллион кижи аңаа киржип, 305 муң тонна макулатураны чыып дужааган.