Дүүн Тываның Баштыңы Владислав Ховалыгның удуртулгазы-биле республиканың Чазаанга «Сибирь дугуржулгазы» регионнар аразының ассоциациязының транспорт талазы-биле координация чөвүлелиниң ээлчеглиг хуралы эрткен.Россия Федерациязының транспорт сайыдының оралакчызы Александр Пошивай, Президентиниң Сибирь федералдыг округда бүрүн эргелиг төлээзиниң инвестиция политиказы болгаш девискээр хөгжүлдезиниң талазы-биле департаментиниң начальниги Иван Гончаров, МАСС-тиң күүсекчи комитединиң төлээлери Геннадий Гусельников, Наталья Донская база Марк Речкин, Сибирь регионнарында транспорт адырының удуртукчулары, ол ышкаш чалаттырган эксперттер болгаш эртем ниитилелиниң төлээлери видеоконференция дамчыштыр чөвүлел хуралга киришкен.
Чөвүлелдиң үре-түңнелдиг ажылының ачызында Сибирьниң чедиишкинниг хөгжүлдезинге болгаш чечектелиишкининге үлүүн киирип турар регионнарга чугула болгаш херек төлевилелдерни камгалап ап болурун Владислав Ховалыг ужуражылганы ажыдып тура, онзалап демдеглээн.
Ужуражылганың киржикчилери ийи айтырыгны сайгарган. Бирги сессияда, Сибирьниң транспорт инфраструктуразын хөгжүдер талазы-биле саналдарын дыңнаан, а ийиги сессияда Сибирь дугуржулгазы ассоциациязының кежигүннери болур регионнарда оруктуң айыыл чок чоруунуң талазы-биле шиитпирлерни боттандырарын чугаалашкан.
Владислав Ховалыг Чөвүлел хуралдың соонда, социал четкилерде бодунуң блогунда бижээни-биле алырга, Россияның Эртемнер Академиязының Сибирь салбырының эртемденнери Сибирьниң транспорт адырының чидиг айтырыгларынга хамаарыштыр боттарының көрүжүн илередип, амгы үеде Тываны таварты Кыдат болгаш Моолче үнер делегей чергелиг транспорт оруун тудар төлевилелди деткээн бооп турар.
«Байкал-Амур болгаш Транссибирь демир-оруктарының чүъгүн эвээжедир ужурлуг чаа маршрут Кыдат Улус Республика база Моол-биле даштыкы садыг-саарылганы көвүдедип, ол ышкаш Россияның социал-экономиктиг болгаш геостратегтиг угланыышкыннарын күштелдирер» - деп, республика баштыңы онзалап айыткан. Ол ышкаш эрткен неделяның төнчүзүнде, регион чазаанга кыдат болгаш моол компаниялар-биле эрткен ужуражылгаларның айтырыы бо тема болганын сагындырган.
Моолдуң соңгу кызыгаарынга чедир моол участокче демир-орукту тудар сорулгалыг улуг инвесторлар Россияның бодунуң девискээринге ол орукту уламчылаар планнарын сонуургаткан. Евразия биле күрүнелерни харылзаштырган ол демир-орук оруу Кыдаттың, Моолдуң болгаш Россияның кады күжениишкиннери-биле чедиишкинниг туттунуп кээр дээрзинге, даштыкы аалчылар улуг бүзүрелин илереткеннер.
"Урумчиге чедер транспорт оруун Пакистан таварыштыр Гвадар портунга чедир узадыр арганы база көрүп турар. Ынчалдыр ол орук Соңгу Доштуг океанны Индий океан-биле тудуштуруптарга, бистиң оруувус херек кырында Төп-Евразийжи апаар" - деп, Владислав Ховалыг бодунуң блогунда бижээн.
Ийиги айтырыгда Сибирь регионнарынга айыыл чок орук системаларын хөгжүдер талазы-биле чаа шиитпирлерни, ооң иштинде чурагайлаашкын ажылдарының дугайында медээлерни таныштырган.
Чөвүлелдиң хуралының түңнелинде, Сибирь регионнарының транспорт адырында бар чидиг айтырыгларны шиитпирлээриниң база хөгжүдериниң талазы-биле элээн каш санал-оналдар кирген. Улаштыр ол санал-оналдарны Россия Федерациязының Чазааның ээлчеглиг хуралдарында сайгарып көөр кылдыр чоруткан.