Июнь 5-тен 7-ге чедир Кызыл хоорайга Россияның чоннарының хөгжүм херекселдериниң «Көшкүн чоннуң каптагайы» деп регионнар аразының эң ховар фестивалы болуп эртер. Алтай, Башкирия, Бурятия, Калмыкия, Татарстан, Хакасия, Якутия республикалардан база Кемерово облазындан база Красноярск биле Москва хоорайлардан 150 хире хөгжүмчүлер Россияның чоннарының хөгжүм чаңчылдарынга тураскааткан бо хемчегге киржир.
Фестивальдың организакчызы – Тыва национал оркестр Россияның Культура яамызының грант деткимчези-биле төлевилелди боттандырып турар. Оркестрниң дыңнатканы болза, мөөрейге киржир күзелин илереткен 160 ажыг кордакчылар аразындан оларның төлевилели грант алыр 21 тиилекчилер санынче кирген.
Фестиваль үезинде көрүкчүлер концерттер, чогаадыкчы ужуражылгалар болгаш мастер-класстар шөлүнге ат-сураглыг хөгжүмчүлер болгаш дирижерлар-биле харылзажыр аргалыг.
Фестиваль амгы үениң байдалында национал хөгжүм чаңчылдарын кадагалап арттырарынче болгаш хөй националдыг чурттуң чаңгыс демниг чоруунга чоннуң уран хөгжүмүнүң ужур-утказын сайгарарынче онза кичээнгейни углаан.
Фестивальдың программазында:
Июнь 5-те 18:00 шакта — «Хүреш» стадионунга фестивальдың болгаш этно-дискотека ажыдыышкыны (кирири халас);
Июнь 6-да 19:00 шакта — Национал театрга «Көшкүн амыдыралдың аялгалары» деп концерт;
Июнь 7-де 18:00 шакта — Национал театрга гала-концерт.
Концерттерже билеттерни Национал театрның кассазындан база онлайн шөлдерден садып ап болур.
"Бодунуң ук-дөзүн ханы билир мастерлер чурттуң көшкүн чоннарының чаңчылчаан ырыларын болгаш чогаалдарын сценага күүседир. Салгалдан салгалче дамчып келген ол аялгалар силерге хосталганың хей-аъдын болгаш амыдыралче чүткүлдү билиндиреринге дузалаар. Бо онзагай концерттиң херечизи болур арганы ажыглаарын утпаңар!" – деп, культурлуг хемчегниң организакчылары кыйгырыгны кылган.