Тывада июнь 1-де чайгы кадыкшылга кампаниязы эгелээн. Регионнуң Өөредилге яамызының дыңнатканы-биле алырга, бо чылын республика девискээринге 175 лагерь, ооң иштинде 22 стационар, 4 майгын база 149 хүндүскү лагерьлер ажылдаар. Тываның 6 хардан 17 харга чедир назылыг уругларның 26 хуузу , азы 18 муң ажыг уруглар чай дургузунда аңаа дыштаныр.
Регионда «изиг шугумну» чаңчыл езугаар ажылдадыр, ада-иелер ынаар долгааш, чайгы лагерьлерже путевкаларны садып алырын, ол ышкаш чайгы кадыкшылга дыштанылгазын организастаары-биле холбашкан өске-даа айтырыгларны шиитпирлээр. Республиканың немелде өөредилге хөгжүдер төвүнүң уругларның дыштанылга болгаш кадыкшылга килдизиниң 8 (39422) 2-72-92 дугаарлыг телефонунче долгааш, консультациялап болур.
Бо хүннерде, июньнуң 1-ден 7-ге чедир, республикада бирги ээлчег ажылдап эгелээн – хүндүскү 135 уруглар лагерьлери ажыттынып турар. Июнь 3-түң байдалы-биле алырга, Кызыл хоорай, Улуг-Хем, Бай-Тайга, Каа-Хем, Бии-Хем, Мөңгүн-Тайга, Сүт-Хөл, Барыын-Хемчик, Чөөн-Хемчик, Кызыл, Сүт-Хөл, Чеди-Хөл кожууннар школаларында, ол ышкаш регионалдыг Өөредилге болгаш Күш-ажыл яамызында, шупту 92 лагерь ажылын эгелээн. Янзы-бүрү культурлуг болгаш дыштанылга хемчеглеринге 8 муң хире уруглар хаара туттунган.
Июньнуң 5-тен 17-ге чедир агаар-бойдустуң байдалын көрүп, хоорайдан дашкаар кадыкшылга лагерьлери ажыттынар – олар бо хүннерде ажыдыышкынга белеткенип турар. Июньнуң 16-дан эгелеп, дүнеки доңнаттар эрте бээрге, майгын лагерьлери ажылын эгелээр.
Тываның Баштыңы Владислав Ховалыгның даалгазы-биле, чайгы сезон эгелээр мурнунда лагерьлерниң белеткелин хынаан. Республиканың удуртукчузу лагерьлерниң санитарлыг-гигиена болгаш өртке удур айыыл чок чоруун хандырар айтырыгларны онза контрольга алырын дааскан. Өөредилге яамызының, өөредилге эргелелдериниң, ОБЯ-ның, Кадык камгалал яамызының, Росгвардияның болгаш Роспотребнадзорнуң специалистеринден тургустунган ведомстволар аразының комиссиязы оларны хынаан.
Cтационар лагерьлер девискээрлеринде айыыл чок чорукту, ол ышкаш санитарлыг нормаларга дүгжүп турарын база чугула эмчи курлавырларының бар-чогун хынаан. Комиссия бичии уругларның дыштанылга программаларынче онза кичээнгейни салган. «Бистиң уругларывыска лагерьге дыштанылга чүгле хөглүг эвес, а айыыл чок болур ужурлуг» - деп, специалистер демдеглээн.
Тывага 2025 чылдың чайгы кадыкшылга кампаниязын организастаарынга 3 муң ажыг кижини хаара тудар, оларның аразында лагерь начальниктери, аъш-чем хандырылгазының ажылдакчылары база вожатыйлар бар.
Тывада уруглар лагерьлери-биле чергелештир, бүдүн республикада 200 ажыг түр үениң дыштанылга төптери ажылдап эгелээн, аңаа уруглар чайгы дыштанылганың дургузунда солун болгаш ханы уткалыг үени эрттирер.