Тываның Баштыңы Владислав Ховалыг Моолдан «Chinggis Khaan Group» база Кыдаттың «China Railway No.5 Engineering Group» мурнакчы инвестиция компанияларының төлээлери-биле Төп-евразийжи транспорт коридору (ЦЕТК) төлевилелди сайгарган ажылчын ужуражылганы эрттирген. Ужуражылгага инфраструктура төлевилелин боттандырарынга сонуургалдыг бедик албан-дужаалдыг специалистер болгаш улуг бүдүрүлгелерниң удуртукчулары, ооң иштинде Енисей Сибириниң регионнарындан, федералдыг албан черлеринден болгаш Даштыкы херектер яамызының Красноярск хоорайда бүрүн эргелиг төлээ черинден, ол ышкаш Россияның кол банкылары – ВТБ, «Газпромбанк», «Сбербанк», «Россельхозбанк» база Россияның Национал банкдан төлээлер келген.
Ужуражылганы ажыдып тура, Владислав Ховалыг Россия, Кыдат, Моол чурттарның аразында удур-дедир ажыктыг кады ажылдажылганы хөгжүдеринге болгаш экономиктиг харылзааларны быжыглаарынга чугула базым деп санаттынып турарын база мындыг төлээлекчи делегацияларның чыглып келгени республикага алдар-хүндү-дүр демдеглээн.
«Тыва Республика казымалдар байлактар адырында улуг курлавырлыг болгаш, ону боттандырар дээш транспорт болгаш энергетика инфраструктуразын хөгжүдери чугула - деп, Тываның Баштыңы чугаалаан. – Делегей чергелиг Төп-евразийжи транспорт коридорун (ЦЕТК) тургузары ада-чурт экономиканың чижилгезин бедидеринге, минералдыг курлавырларның улуг рыногунда Россияның туружун быжыглаарынга болгаш делегей чергелиг транспорт четкизинге национал төлевлелдерни каттыштырарынга кол черни ээлеп турар мурнады шиитпирлээр болгаш стратегтиг чугула төлевилел кылдыр көрүп турар».
ЦETК ада-чурт барааннарның чижилгелиг чоруунуң өзүлдезин хандырар болгаш Азия-Оожум океан регионунче чиг этти үндүр сөөртүрүнүң аргаларын калбартыр стратегтиг төлевилел апаар ужурлуг. Ужуражылганың киржикчилери Россиядан Тыва таварты Барыын Кыдатче бедик шынарлыг автомобиль оруун тударының, ол ышкаш Арцсуурьдан (Моолдуң Тыва-биле кызыгаары) Кыдаттың кызыгаарга чедир амгы үениң автоорук тудуун сайгарып көрген.
Владислав Ховалыг ЦETК төлевилел Кыдат биле Моол инвесторларның бот-боттарынга ажыктыг кады ажылдажылгазын хөгжүдеринге болгаш үш чурттуң аразында экономиктиг харылзааларны быжыглаарынга улуг ужур-дузалыг деп үнелээн. Президент Владимир Путинниң даалгазы-биле ЦЕТК-ни тургузар идеяга сонуургалдыг, Тываның Чазаа Хакас Республиканың болгаш Красноярск крайның удуртулгазы-биле кады ЦЕТК-ти тургузарының баш бурунгаар техниктиг-экономиктиг үндезинин ажылдап эгелээн. Удавас Санкт-Петербургтуң делегейниң экономиктиг шуулганының шөлүнге ооң дугайында чугааны уламчылаар.
«Үш талалыг чугаалажыышкыннар маршрутка, чүък сөөртүлгезиниң баазазынга баш бурунгаар санаашкыннарга болгаш тудугнуң хуусааларынга хамаарышкан хөй айтырыгларны дүрген шиитпирлээринге дузалаан — деп, Тываның Баштыңы ужуражылга соонда бодунуң блогунда бижээн. — Видеоконференция дамчыштыр ужуражылгага киришкен федералдыг эрге-чагырга органнарындан, ылаңгыя «РЖД»-ден коллегаларымга, Енисей Сибириниң регионнарындан төлээлерге четтиргеним илереттим. ЦЕТК-ны тургузары – мурнады шиитпирлээр болгаш стратегтиг чугула төлевилел, ол делегей чергелиг казымал курлавырлар рыногунда Россияның туружун быжыглаарынга болгаш национал төлевилелдерни делегей чергелиг транспорт четкизинге кииреринге кол ужур-дузалыг».
Ужуражылганың түңнелдери киржикчилерниң ЦЕТК-ны делегей чергелиг экономиктиг шөлдүң кол кезээ кылдыр боттандырарының чугулазынга хамаарыштыр ниити туружун бадыткаан болгаш регионда чиг этти сөөртүр болгаш казып тывар комплекстиг төлевилелди ажылдадырынга кады ажылдаар болгаш харылзаштырар дугайында дугуржулганы улам быжыглаан.