Бөгүн Сибирь девискээринге дроннар халдаашкыны демдеглеттинген. Ооң мурнунда Россияның төп болгаш барыын регионнарынче дайзынның дроннары кээп турган болза, бо удаада Сибирьде объектилерже – Иркутск облазынче бир дугаар халдаан. Тываның Баштыңы Владислав Ховалыг республиканың чурттакчыларынга кыйгырыында ол болуушкунга хамаарыштыр дүвүрээзин үндүрери чылдагаан чок дээрзин демдеглээн. Ооң-биле холбаштыр бадыткаттынмаан азы меге медээлер таратпазын, Тываның чурттакчыларынга амыр-тайбың чорукту кадагалаары чугула дээрзин дыңнаткан:"Чүгле албан езузунуң медээлеринге бүзүреп, меге чүүлдер тарадырынче киришпезин шупту чаңгыс чер чурттугларымдан диледим! Иркутск облазында, Бурятияда айыыл чок чоруктуң хемчеглерин күштелдирген. Тываның айыыл чок чорук албан черлеринда база айтыышкыннар келген. Хамаатыларның амы-тынынга болгаш кадыынга айыыл чок, девидеп коргар чылдагааннар чок - деп Владислав Ховалыг социал четкилерде бодунуң блогунда бижээн. - Серемчилелдиг болуп, меге медээлер тарадырын болдурбазын, кижи бүрүзү амгы бо байдалда турум болгаш корум-чурумну тударынга дузалажыылыңар».
Иркутск облазының губернатору Игорь Кобзевтиң бодунуң блогунда дыңнатканы-биле алырга, Сибирьге бир дугаар дроннар халдаашкынының уржуун чайлаткан, чаңгыс чер чурттугларның амы-тынынга болгаш кадыынга айыыл чок. Средний суурда шериг кезээнче дроннар-биле халдаан. Оперативтиг болгаш камгалал албаннары: ФАА, ОБЯ ажылдакчылары, Росгвардия дайынчылары ол черде ажылдап турар. Ында айыыл чок чоруктуң чурумун киирген.